غزہ – (روزنامہ قدس ـ آنلائن خبر رساں ادارہ) ایمنسٹی انٹرنیشنل نے ہیلپ ایج انٹرنیشنل کے ساتھ مشترکہ تحقیق کی بنیاد پر خبردار کیا ہے کہ غزہ میں بزرگ افراد ایک سنگین صحتی، جسمانی اور نفسیاتی بحران سے دوچار ہیں۔ تنظیم کے مطابق منظم غفلت اور ان کی زندگی کے حالات میں غیر معمولی بگاڑ نے بزرگوں کی مشکلات کو خطرناک حد تک بڑھا دیا ہے۔
دونوں تنظیموں نے نشاندہی کی کہ قابض اسرائیل کی جانب سے عائد محاصرے کے تسلسل کے باعث امداد اور بنیادی ادویات کی غزہ میں آمد مسدود ہے جبکہ حالیہ پابندیوں نے غزہ میں انسانی ہمدردی کے اداروں کے کام کو بھی بری طرح متاثر کیا ہے جس سے بحران مزید گہرا ہو گیا ہے۔
تنظیموں کی جانب سے کیے گئے صحتی سروے کے مطابق متعدد بزرگوں نے بتایا کہ خوراک کی شدید قلت نے انہیں مکمل کھانے چھوڑنے پر مجبور کیا ہے تاکہ وہ اپنے خاندان کے دیگر افراد کے لیے کچھ غذا بچا سکیں۔ کئی بزرگ ایسے بھی ہیں جنہیں دائمی اور خطرناک بیماریوں کے لیے مقررہ ادویات کی خوراک کم کرنا پڑی یا مکمل طور پر ترک کرنا پڑا کیونکہ ادویات ختم ہو چکی ہیں یا دستیاب نہیں۔
ایمنسٹی انٹرنیشنل نے بے گھر کیے گئے بزرگوں کی شہادتیں نقل کرتے ہوئے بتایا کہ مناسب خوراک، محفوظ پناہ گاہ اور طبی خدمات سے محرومی نے ان کی صحت کو شدید نقصان پہنچایا ہے۔ یہ سب کچھ ایک مسلسل محاصرے اور جبری بے دخلی کے سلسلے کے دوران ہو رہا ہے جو سنہ 2023ء کے اکتوبر/تشرین الاول سے جاری ہے۔
تنظیم میں تحقیق، وکالت، پالیسی اور مہمات کی سینیئر ڈائریکٹر ایریکا گیویرا روساس نے کہا کہ غزہ کے بزرگ اپنی صحت کے حوالے سے ایک غیر مسبوق انہدام کا سامنا کر رہے ہیں۔ ان کے مطابق قابض اسرائیل دانستہ طور پر فلسطینیوں کو ایسے حالاتِ زندگی میں دھکیل رہا ہے جن کا مقصد انہیں مادی طور پر تباہ کرنا ہے۔
انہوں نے مزید کہا کہ قابض افواج کی جانب سے امداد کی ترسیل پر عائد سخت اور غیر انسانی پابندیوں نے بزرگوں کی صحتی نگہداشت، ادویات، خوراک اور رہائش تک رسائی کی صلاحیت کو بری طرح کمزور کر دیا ہے۔
ہیلپ ایج انٹرنیشنل کے سروے میں 416 بزرگوں کو شامل کیا گیا جس سے معلوم ہوا کہ 76 فیصد بزرگ خیموں میں زندگی گزار رہے ہیں جو اکثر حد سے زیادہ بھرے ہوتے ہیں۔ 84 فیصد نے بتایا کہ ان کے رہائشی حالات ان کی صحت پر منفی اثر ڈال رہے ہیں اور ان کی نجی زندگی کو پامال کر رہے ہیں۔ اسی طرح 79 فیصد بزرگوں نے بتایا کہ وہ سنہ 2023ء کے اکتوبر/تشرین الاول کے بعد تین مرتبہ سے زیادہ جبری بے دخلی کا شکار ہو چکے ہیں۔
سروے کے نتائج کے مطابق 68 فیصد بزرگوں کو ادویات کی قلت کے باعث اپنی خوراک کم کرنا پڑی یا علاج روکنا پڑا۔ 11 فیصد افراد نے گذشتہ 24 گھنٹوں میں ایک بھی کھانا نہیں کھایا جبکہ 48 فیصد نے دوسروں کے لیے خوراک میسر کرنے کی خاطر اپنی غذائی مقدار کم کر دی۔
ایمنسٹی انٹرنیشنل نے قابض حکام سے مطالبہ کیا کہ غزہ پر عائد محاصرہ فوری طور پر اور بلا کسی شرط کے اٹھایا جائے اور ادویات، رہائشی سامان اور بنیادی ضروریات کی ترسیل کی اجازت دی جائے۔ تنظیم نے واضح کیا کہ بزرگوں کے حقوق اور ان کی انسانی ضروریات کو نظر انداز کرنا یا انہیں ثانوی مسئلہ سمجھنا ہرگز قابل قبول نہیں۔
اس سے قبل انسانی حقوق کی رپورٹس میں بھی زور دیا جا چکا ہے کہ بزرگوں، بچوں اور مریضوں کی بڑھتی ہوئی تعداد براہ راست صحتی سہولیات کی عدم دستیابی، غذائی قلت اور بھوک کے باعث جان کی بازی ہار رہی ہے۔ رپورٹس کے مطابق قابض اسرائیل کے محاصرے کے نتیجے میں غزہ کا صحتی نظام منظم انداز میں تباہ ہو چکا ہے۔ ان میں یہ بھی نشاندہی کی گئی کہ غزہ میں وزارت صحت کے پاس ان اموات کی مؤثر نگرانی کا نظام نہ ہونے کے باعث انہیں قدرتی اموات کے طور پر درج کر لیا جاتا ہے حالانکہ حقیقت میں یہ دانستہ بھوک مسلط کرنے اور صحتی نظام کی تباہی کی براہ راست پیداوار ہیں جو بین الاقوامی انسانی قانون اور بین الاقوامی فوجداری قانون کے تحت قتلِ عمد کے زمرے میں آتی ہیں۔
