(روز نامہ قدس ۔آنلائن خبر رساں ادارہ ) آئرلینڈ نے انسانی ہمدردی کے جزبے کے تحت اسرائیلی جارحیت کے نتیجے میں غزہ کے محصور فلسطینیوں کےلیے 1.5 ملین ڈالر کی امداد فراہم کرنے کا اعلان کر دیا۔
غیر ملکی خبر رساں ادارے کے مطابق آئرلینڈ کے وزیر برائےخارجہ امور سائمن کوونی کی جانب سے بیان جاری کیا گیا ہے جس کے مطابق آئرش حکومت نے مقبوضہ فلسطین میں اسرائیلی جارحیت کے نتیجے میں غزہ کے محصور فلسطینیوں کےلیے بگڑتی ہوئی صورتحال میں انسانی ہمدردی کے تحت غزہ کی پٹی میں فلسطینی عوام کے لئے ہنگامی بنیادوں پرامداد کے لئے 1.5 ملین ڈالر مختص کرنے کا اعلان کیا ہے۔
سائمن کوونی نے کہا ہےکہ آئرش ایڈ کی مالی اعانت کا اعلان اقوام متحدہ کو غزہ کےضرورت مند افراد کو ہنگامی بنیادوں پر امداد فراہم کرے گا، ساتھ ہی ان کا کہنا ہے کہ فلسطین میں بچوں کو بم باری کا نشانہ بنانا ایک شرم ناک سانحہ ہے ، یونیسیف غزہ میںاس محاز آرائی میں بچوں کی حالت اور ان کے ساتھ ہونے والے مظالم سے نمٹنے میں ان کی مدد کرے۔
ان کا مزید کہنا تھا کہ آئر لینڈ نے اقوام متحدہ کی سلامتی کونسل میں غزہ میں فوری طور پر جنگ بندی اور شہریوں کے تحفظ کا مطالبہ کیا اور میں اسرائیل سے گزارش کرتا ہوں کہ وہ انسانی ہمدردی کے تحت زخمیوں اور بے گھر ہوجانے والے فلسطینیوں کی امداد کے لیے سامان اور امدادی کارکنان کی فلسطینیوں تک رسائی کو یقینی بنائے۔