(روزنامہ قدس ۔آنلائن خبر رساں ادارہ )عراقی وزیر اعظم عدیل عبدالمہدی نے فلسطین کاز کی غیر مشروط حمایت جاری رکھنے کا اعلان کرتے ہوئے کہا ہے کہ عراق فلسطین سے متعلق اپنے اصولی موقف پر قائم ہے اور کوئی بھی چیز ہمیں فلسطینیوں سے متعلق موقف سے دست بردار نہیں کرواسکتی۔
تفصیلات کے مطابق پیر کے روز اپنے فلسطینی ہم منصب محمد اشتیوی کے ہمراہ ایک مشترکہ پریس کانفرنس کے خطاب کرتے ہوئے عراقی وزیر اعظم نے کہا کہ عراق خطے میں اسرائیل کی جانب سے یہودی آباد کاری کے تمام منصوبوں کو پوری شدت سے مسترد کرتا ہے۔
ان کا یہ بھی کہنا تھا کہ عراق فلسطینی عوام کو ہر قسم کے تعاون کی فراہمی جاری رکھے گا ،اور ہر مشکل وقت میں فلسطینی عوام کے ساتھ کھڑا ہوگا اور کسی بھی صورت انکو تنہا نہیں چھوڑے گا۔
انہوں نے گزشتہ ماہ بحرین میں ہونے والی نام نہاد اقتصادی کانفرنس کو بہادری سے ناکام بنانے پر فلسطینی قیادت اور عوام کو خراج تحسین پیش کرتے ہوئے کہا کہ جو لوگ اس کو کامیاب بنانے چاہتے تھے،فلسطینی عوام کی مزاحمت سے ان کو شدید کوفت کا سامنا کرنا پڑا ہے۔
عراقی وزیر اعظم نے اس عزم کا بھی اظہار کیا کہ مسئلہ فلسطین ہمارے لیے سب سے اہم ہے اور اس کے حل کے لیے ہم کسی بھی حد تک جائیں گے اور حالات جو بھی ہوں،ہماری ساری طاقت فلسطینیوں کی حمایت کے لیے صرف ہوگی۔
اس موقع پر بات کرتے ہوئے فلسطینی وزیراعظم محمد اشتیوی نے کہا کہ عراق کی سلامتی اور متحد رہنا نہ صرف فلسطین کے لیے ضروری ہے بلکہ عرب ممالک کے لیے بھی فائد ہ مند ہے۔انہوں نے خطے میں موجود مسائل کے حل کے لیے عراق کے کردار کو سراہتے ہوئے کہا کہ مسائل کے حل کے لیے عراق مثبت کردار ادا کر رہاہے۔