(روزنامہ قدس ـ آنلائن خبر رساں ادارہ) اقوامِ متحدہ کی ماہر برائے انسانی حقوق فرانسیسکا البانیز نے کہا ہے کہ بہت سے لوگوں کو حماس کے بارے میں درست اور واضح معلومات حاصل نہیں ہیں حالانکہ حقیقت یہ ہے کہ حماس ایک سیاسی تحریک ہے نہ کہ قاتلوں کا گروہ جیسا کہ اسے جھوٹے پروپیگنڈے کے ذریعے پیش کیا جاتا ہے۔
فرانسیسکا البانیز نے وضاحت کی کہ حماس نے غزہ میں اقتدار 2006ء کے اُن انتخابات کے ذریعے حاصل کیا جو سب سے زیادہ جمہوری قرار دیے گئے۔ یہ تحریک کوئی قاتل گروہ نہیں بلکہ ایک سیاسی قوت ہے جس نے عوامی مینڈیٹ کے تحت حکومت بنائی۔ انہوں نے کہا کہ افسوسناک امر یہ ہے کہ دنیا کے بہت سے لوگ بغیر تحقیق کے ایک ہی من گھڑت کہانی دہراتے ہیں لیکن حقیقت سے ناواقف رہتے ہیں۔
البانیز نے زور دے کر کہا کہ حماس نے اقتدار میں آ کر سکول قائم کیے، عوامی ادارے بنائے اور ہسپتال کھولے۔ یعنی وہ غزہ میں ایک باقاعدہ سیاسی اور انتظامی اتھارٹی کے طور پر سامنے آئی۔ لہٰذا جب حماس کا ذکر کیا جائے تو اسے کسی خون کے پیاسے قاتل گروہ یا صرف مسلح جنگجوؤں کی جماعت کے طور پر پیش کرنا سراسر غلط اور گمراہ کن ہے۔
قابل ذکر بات یہ ہے کہ فرانسیسکا البانیز کو صہیونی حمایتی ٹرمپ انتظامیہ نے سزا کے طور پر پابندیوں کا نشانہ بنایا۔ امریکی وزیر خارجہ مارکو روبیو نے اعلان کیا کہ انہیں اس فہرست میں شامل کیا گیا ہے کیونکہ وہ عالمی فوجداری عدالت پر امریکہ اور قابض اسرائیل کے خلاف کارروائی کرنے کے لیے زور دیتی رہی ہیں۔ امریکہ کی اقوامِ متحدہ میں مستقل نمائندگی نے جولائی کے آغاز میں ایک بیان میں البانیز کے خلاف منظم گھٹیا مہم چلاتے ہوئے جھوٹا اور من گھڑت دعویٰ کیا تھا کہ وہ مبینہ طور پر قابض اسرائیل مخالف اور یہود دشمن بیانیے کو ہوا دے رہی ہیں اسی لیے ان کی برطرفی ضروری ہے۔ مزید یہ کہ امریکہ نے اقوامِ متحدہ کے سیکرٹری جنرل انتونیو گوٹیرش سے مطالبہ کیا ہے کہ وہ فرانسیسکا البانیز کو ان کے منصب سے ہٹا دیں۔
