(روزنامہ قدس ۔آن لائن خبر رساں ادارہ ) أحمد جمعہ أبو جزر کو 19 دسمبر 2020 کو رہا کیا جانا تھا لیکن صہیونی فوجی عدالت نے ان کی مدت قید میں غیر قانونی طور پر 20 ماہ کا مزید اضافہ کردیا ہے۔
فلسطینی قیدیوں کی تفصیلات فراہم کرنےوالے ادارے کلب برائے اسیران کی جانب سے جاری رپورٹ میں انکشاف کیا گیا ہے کہ صہیونی فوجی عدالت نے جلبوع جیل میں مقبوضہ فلسطین کے محصور شہر غزہ کے علاقے رفح سے تعلق رکھنے والے 34 سالہ أحمد جمعہ أبو جزر کی مدت قید میں مزید 20 ماہ کا اضافہ کردیا ہے۔
احمد جمعہ ابو جزر کو صہیونی فوج نے 19دسمبر 2003 کو فلسطینی مزاحمتی تنظیم اسلامی جہاد سے تعلق رکھنے اوراسرائیل کی سلامتی کے خلاف اقدامات کرنے کے الزام میں گرفتارکیا تھا جس کے بعد اسرائیل فوجی عدالت نے انھیں 17 سال قید کی سزا سنائی تھی ۔