(روز نامہ قدس ۔آنلائن خبر رساں ادارہ ) صیہونی غیرقانونی آبادکاروں نے یہودی مذہبی تہوار کے موقع پر یہودی مذہبی رسومات کی ادائیگی کے نام پر الخلیل شہر میں ابراہیمی مسجد اور دیگر مقدس مقامات کی بے حرمتی کی۔
مقامی فلسطینی ذرائع کا کہنا ہے کہ گزشتہ روز صیہونی شرپسندوں کی بڑی تعداد نے یہودی مذہبی تہوار ‘عید پوریم’ کے موقع پر اسرائیلی فوج اور پولیس کے حفاظتی حصار میں مسلمانوں کے تاریخی اور مقدس مقامات پر دھاوے بولے۔
صیہونی شرپسندوں کی بڑی تعداد نے غرب اردن کے جنوبی شہر الخلیل میں مسجد ابراہیمی اور دیگر تاریخی مقامات پر مذہبی تعلیمات کے مطابق رسومات ادا کیں، مقامی ذرائع کا کہنا ہے کہ یہودی آبادکاروں نے تل ارمیدہ کے مقام پر قائم مذہبی تاریخی مقامات میں گھس کر تلمودی تعلیمات کے مطابق مذہبی رسومات ادا کیں۔
یہودی آباد کاروں نے مسجد ابراہیمی، مسجد جبل رحمت ، تل ارمیدہ ، شاہراہ شہداء اور السھلہ کے علاقوں میں گھس کر تلمودی تعلیمات کے مطابق مذہبی رسوموات ادا کیں۔ادھراسرائیلی فوج نے گذشتہ روز غرب اردن کے تاریخی شہر الخلیل میںیہودی آباد کاروں کو فول پروف سیکیورٹی مہیا کرنے کے لیے 20 مقامات پر ناکے لگا کر یہودی آباد کاروں کو سیکیورٹی فراہم کی۔