(روز نامہ قدس ۔آنلائن خبر رساں ادارہ ) سابق اسرائیلی وزیر دفاع نے کہا ہےکہ نیتن یاہو اپنےخلاف کرپشن کے الزامات سے بچنے کے لئے ایران کو ایک دہشت گردریاست کے طور پر متعارف کروارہے ہیں۔
تفصیلات کے مطابق گذشتہ روز قابض ریاست اسرائیل کی فوج کے سابق سربراہ اور سابق وزیر دفاع موشے یعلون کی جانب سے سماجی رابطے کی ویب سائٹ ٹوئٹر پرپیغام میں کہا گیا ہے کہ اسرائیلی وزیر اعظم بینجمن نیتن یاہوکا ایران کے خلاف خوف و ہراس پھیلانا اپنے ذاتی مفادات کے لئےہے ۔
موشے یعلون نے کہا کہ اسرائیلی وزیراعظم اپنے خلاف کرپشن کے الزامات سے بچنے کے لئے ایران کو ایک دہشت گرد ریاست کے طور پر متعارف کروا رہے ہیں، وہ اپنےذاتی مفادات کو اسرائیلی ایجنڈے پر فوقیت دے رہے ہیں۔
سابق اسرائیلی وزیر دفاع نے کہا کہ بینجمن نتن یاہو یمینہ پارٹی اور نفتیل بینیت کے ساتھ اتحادی حکومت بنانا چاہتے ہیں تاکہ عدالت میں ان کے خلاف کرپشن پر جو قانونی سماعت ہو رہی ہے اسے روکا جا سکے۔
خیال رہے کہ صہیونی ریاست کے سابق وزیر دفاع کا بیان ایک ایسے وقت میں سامنے آیا ہے جب ایران کے نیوکلیئر پلانٹ نطنز پر حملہ ہوا اور یہاں ہونے والا کام اب کئی ماہ تک التوا کا شکار ہو چکا ہے۔