(روزنامہ قدس ۔آن لائن خبر رساں ادارہ) ملائیشیا کے وزیراعظم نے کہا ہے کہ فلسطینی قوم سات دھائیوں سے اپنے حقوق کے لیے لڑ رہی ہے۔ امریکا نے آج ایک بار پھر فلسطینی قوم کے ساتھ انصافی کرکے اسے مایوس کیا ہے۔
ملائیشیا کے وزیراعظم مہاتیر محمد نے القدس پارلیمنٹیرینز ایسوسی ایشن کی تیسری سالانہ کانفرنس کی افتتاحی تقریب سے خطاب کرتے ہوئے مشرق وسطیٰ کے لیے امریکا کے نام نہاد امن منصوبے ‘صدی کی ڈیل’ کو غیر منصفانہ اور ناقابل قبول قراردیتے ہوئے کہا ہے کہ امریکا کے منصوبے کے نتیجے میں فلسطینی قوم کے خلاف اسرائیل کی نسل پرستی کے جرائم کی حوصلہ افزائی ہوگی، نام نہاد "امن منصوبہ” کبھی بھی خودمختار فلسطینی ریاست کا ذریعہ نہیں بن سکےگا، امریکی منصوبہ مشرق وسطیٰ میں حالات کو ٹھیک کرنے کے بجائے معاملات کو مزید خراب کرنے کا موجب بنے گا۔
انھوں نے اس سازشی منصوبے کو مستردکرتے ہوئے کہا ہے کہ اس پلان میں لاکھوں فلسطینیوں کے حقوق کو پامال کیا گیا، اس ناقابل قبول اور غیر منصفانہ منصوبے نے دنیا کے کروڑوں مسلمانوں اور عیسائیوں کے جذبات کو ٹھیس پہنچائی ہے ۔
مہاتیر محمد نے کہا کہ فلسطینی قوم کی دگر گوں حالت عالمی برادری کے لیے لمحہ فکریہ ہے جب تک فلسطینی قوم کو اس کے اصولی اور مسلمہ حقوق نہیں ملتے اس وقت تک خطے میں پائیدار امن کا قیام ممکن نہیں ہوگا۔