(روز نامہ قدس ۔آنلائن خبر رساں ادارہ ) اونروا کی ترجمان کا کہناہے کہ ‘اونروا’ اور لبنانی محکمہ صحت کے درمیان مکمل رابطہ ہے اور ہم کسی بھی ہنگامی صورت حال سے نمٹنے کے لیے تیار ہیں، پنا ہ گزین کیمپ میں کرونا وائرس کا کوئی کیس نہیں ہے ۔
فلسطینی پناہ گزینوں کی بہبود کے لیے کام کرنے والی اقوام متحدہ کی ‘ریلیف اینڈ ورکس ایجنسی’ (اونروا) کی لبنان میں ترجمان ھدیٰ السمرا نے ایک بیان میں کہا کہ لبنان میں فلسطینی پناہ گزینوں میں کرونا وائرس کا کوئی کیس سامنے نہیں آیا ہے، اونروا پناہ گزینوں کی بہبود کے ساتھ ساتھ ان کی صحت کی حفاظت کو یقینی بنانے کے لیے تمام ممکنہ اقدامات کررہی ہے ۔
ھدیٰ السمرا کاکہنا تھا کہ لبنان میں اسکول کی ایک فلسطینی طالبہ کے کرونا کا شکار ہونے کی خبرمیں کوئی صداقت نہیں ہے پناہ گزین کیمپ پوری طرح اس وائرس سے محفوظ ہے ۔
واضح رہے کہ گذشتہ روز بعض ذرائع ابلاغ نے کہا تھا کہ لبنان میں فلسطینی پناہ گزینوں کے کیمپوں میں کرونا وائرس پھیلنے کا خدشہ ہے۔ ذرائع کا کہنا تھا کہ لبنان میں ایک فلسطینی پناہ گزین بچی کے کرونا کے وائرس کا شکار ہونے کا دعویٰ کیا گیا تھا تاہم اونروا نے ان افواہوں کی سخت سے تردید کی ہے۔