(روزنامہ قدس ۔آن لائن خبر رساں ادارہ) سینئر فلسطینی صحافی کی گرفتاری صہیونی ریاست اور فلسطینی اتھارٹی کے مظالم دنیا کے سامنے لانے پرعمل میں لائی گئی ہے اوراسے آزادی اظہار رائے کی پاداش میں انتقام کا نشانہ بنایا جا رہا ہے۔
تفصیلات کےمطابق عباس ملیشیا کے ہاتھوں دو روز قبل غرب اردن کے شمالی شہر طولکرم سے گرفتار کئے جانے والے سینئر فلسطینی صحافی سامی الساعی کے جوڈیشل ریمانڈ میں 15 دن کی توسیع کرتے ہوئے الساعی کو جیل منتقل کردیا ہے۔
فلسطینی اتھارٹی کی عدالت نے سائبر کرائم ایکٹ 39 کے تحت صحافی سامی الساعی کو سوشل میڈیا کے قوانین کی خلاف ورزی کرنے کی پاداش میں جوڈیشل ریمانڈ پر پندرہ دن کے لیے حراست میں رکھنے کا حکم دیا ہے۔
واضح رہے کہ فلسطینی انٹیلی جنس سروس نے 2 فروری 2017 ء کو صحافی سامی الساعی کو گرفتار کیا تھا۔ عدالت کی طرف سے الساعی کی رہائی کا حکم دیا گیا تھا مگر عدالتی حکم کے علی الرغم 30 دن مسلسل تاخیر اور ٹال مٹول کے بعد الساعی کی رہائی عمل میں لائی گئی تھی۔