(روز نامہ قدس ۔آنلائن خبر رساں ادارہ) غزہ میں فلسطینی وزارتِ صحت کی جانب سے جاری کردہ ایک پریس بیان میں اعلان کیا ہے کہ گزشتہ 24 گھنٹوں کے دوران غیر قانونی صیہونی ریاست اسرائیل کی مسلسل جاری دہشتگردی کے نتیجے میں خواتین اور بچوں سمیت مزید 40 فلسطینی شہید اور 146 زخمی ہوئے ہیں، جنہیں غزہ کی مختلف اسپتالوں میں منتقل کیا گیا ہے۔
وزارتِ صحت نے اس بات کی تصدیق کی کہ "ابھی بھی متعدد شہداء ملبے کے نیچے اور سڑکوں پر موجود ہیں، جن تک ایمبولینس اور سول ڈیفنس کی ٹیمیں شدید بمباری اور میدانِ جنگ کی خطرناک صورتحال کے باعث نہیں پہنچ پا رہیں۔”
سرکاری اعداد و شمار کے مطابق غیر قانونی صیہونی ریاست اسرائیل کے سات اکتوبر 2023 سے جاری حملوں کے نتیجے میں اب تک مجموعی شہادتوں کی تعداد 50,886 ہو چکی ہے، جب کہ 115,875 افراد زخمی ہوئے ہیں۔
وزارت نے مزید بتایا کہ 18 مارچ 2025 سے آج تک کی تازہ کارروائیوں میں 1,522 فلسطینی شہید اور 3,834 زخمی ہوئے ہیں۔