غزہ ۔ روزنامہ قدس ـ آنلائن خبر رساں ادارہ
قابض اسرائیل کی جانب سے جنگ بندی کی مسلسل خلاف ورزیوں کے نتیجے میں بدھ کے روز مشرقی خان یونس اور غزہ کے وسطی علاقے میں اسرائیلی فائرنگ کے باعث دو شہری شہید اور متعدد زخمی ہوگئے۔ اس سے قبل ایک فلسطینی شہری اپنے زخموں کی تاب نہ لاتے ہوئے جام شہادت نوش کر گیا تھا۔ اسی دوران قابض اسرائیلی طیاروں نے رفح پر بمباری کی اور مشرقی علاقوں پر گولہ باری کا سلسلہ جاری رکھا۔
ایک طبی ذریعے نے بتایا کہ محمود محمد محمود ابو شاب کی میت اور ایک زخمی کو ناصر ہسپتال خان یونس لایا گیا۔ انہیں قابض اسرائیل کے کواڈ کاپٹر نے بنی سہیلا میں الفارابی سکول کے قریب نشانہ بنایا تھا۔
شہید ابو شاب کے اہل خانہ نے قابض صہیونی فوج کی اس دہشت گردی کی شدید مذمت کی اور غم و غصے کے ساتھ ان کا آخری دیدار کیا۔
اسی طرح وسطی غزہ میں مغازی کیمپ کے مشرقی علاقے میں شہریوں کے ایک مجمع کے قریب اسرائیلی حملے میں ایک اور فلسطینی شہید اور متعدد زخمی ہوگئے۔
اس سے قبل مقامی ذرائع نے اطلاع دی تھی کہ ایاد فضل القہوجی بنی سہیلا خان یونس کے مشرقی علاقے میں اسرائیلی حملے میں زخمی ہونے کے بعد دم توڑ گئے۔
آج صبح قابض اسرائیلی طیاروں نے جنوبی غزہ کے شہر رفح پر بھی ایک فضائی حملہ کیا۔
قابض اسرائیل کے جنگی ہیلی کاپٹروں نے مشرقی خان یونس پر بھی فائرنگ کی۔
قابض اسرائیل نے دس اکتوبر کو ہونے والے سیز فائر معاہدے کے بعد سے اب تک سیکڑوں مرتبہ جنگ بندی کی خلاف ورزیاں کی ہیں جن کے نتیجے میں 349 فلسطینی شہید اور 871 زخمی ہو چکے ہیں۔
اس معاہدے نے وہ نسل کش جنگ روکی تھی جو قابض اسرائیل نے 7 اکتوبر سنہ 2023 کو شروع کی اور دو برس تک جاری رکھی۔ اس وحشیانہ جنگ میں تقریباً 70 ہزار فلسطینی شہید اور لگ بھگ ایک لاکھ اکہتر ہزار زخمی ہوئے اور غزہ کی 90 فیصد شہری تنصیبات ملبے کا ڈھیر بن گئیں۔
