(روزنامہ قدس ۔آن لائن خبر رساں ادارہ) قابض صیہونی فوج نے غزہ میں سرحدی باڑ سے داخل ہوکر فلسطینی کسانوں کی زرعی زمینوں کو ہموار کردیا جبکہ عارضی تعمیر کردہ املاک کو بھی مسمار کردیا۔
عینی شاہدین کے مطابق قابض صیہونی فو ج نے آج صبح مقبوضہ فلسطین کے محصور شہر غزہ کے جنوبی علاقے خان یونس میں خزاعہ کے مقام پر غزہ کی سرحدی باڑ میں ہیوی مشینری کے ساتھ داخل ہوکر فلسطینیوں کی زرعی زمینوں کو ہموار کردیا، کارروائی میں قابض فوج نے 6 فوجی بلڈوزروں کا استعمال کرتے ہوئے فلسطینیوں کی عارضی تعمیر کردہ املاک کو بھی مسمار کردیا ۔
واضح رہے کہ قابض فوج اکثر غزہ کی سرحدی باڑ کو توڑکر داخل ہوتی ہے اور اردگرد موجود فلسطینیوں کو گرفتارکرکے لے جاتی ہے جن پر اسرائیل میں غیر قانونی طورپر داخل ہونے کا مقدمہ چلایا جاتا ہے ، گزشتہ 5 سالوں کے دوران صیہونی فوج نے 42فلسطینیوں کو غزہ میں داخل ہوکر گرفتارکرنے کے بعد ان پر اسرائیل میں داخل ہونے کا الزام لگا کر قید میں ڈالا ہوا ہے ۔