(روز نامہ قدس ۔آنلائن خبر رساں ادارہ) غیر قانونی صیہونی ریاست اسرائیل نے غزہ پر اپنی دہشتگردانہ کارروائیوں کو بارہویں روز بھی جاری رکھا ہوا ہے، جس میں چھاپے مارنے، قتل و غارت اور نسل کشی میں وحشیانہ حد تک اضافہ ہو گیا ہے۔
غزہ کے جنوبی علاقے خان یونس میں فلسطینیوں کے ایک گروہ پر حملہ کیا گیا، جس میں پانچ شہری شہید اور دیگر زخمی ہوگئے۔ خان یونس کے جنوبی علاقے قزان النجار میں بے گھر افراد کے خیموں پر بمباری کے نتیجے میں دو شہری شہید اور دیگر زخمی ہوئے۔
طبی ذرائع کے مطابق ہفتے کی صبح سے اب تک اسرائیلی فضائی حملوں میں 22 شہری شہید اور درجنوں زخمی ہوچکے ہیں۔ ہفتے کی صبح اسرائیلی جنگی طیاروں نے شمالی غزہ اور خان یونس کے مشرقی اور جنوبی علاقوں پر بمباری کی۔ رفح کے مغرب میں بھی مکانات کو تباہ کرنے کے لیے بم دھماکے کیے گئے۔
خان یونس کے شمالی علاقے القرارہ میں ایک گھر پر بمباری سے ایک شہری شہید اور سات زخمی ہو گئے۔ گزشتہ 24 گھنٹوں میں غزہ کے مختلف حصوں پر شدید بمباری کے نتیجے میں فلسطینیوں کی شہادت کی تعداد 50 تک پہنچ گئی۔
غیر ملکی خبر رساں اداروں کے مطابق غزہ پر اسرائیل کے حملے جاری ہیں، اور میڈیا رپورٹس کے مطابق خان یونس کے 8 شہدا میں زیادہ تر بچے اور خواتین شامل ہیں۔ گزشتہ روز بھی اسرائیل نے غزہ کی مارکیٹ سمیت مختلف علاقوں پر حملہ کیا، جس کے نتیجے میں مزید 40 فلسطینی شہید ہوئے۔
غزہ میں 7 اکتوبر 2023 سے جاری غیر قانونی صیہونی ریاست اسرائیل کی جارحیت کے نتیجے میں فلسطینیوں کی شہادت کی تعداد 50 ہزار سے تجاوز کر چکی ہے۔