(روزنامہ قدس ۔آن لائن خبر رساں ادارہ) یورپی یونین کا کہنا ہے کہ غرب اردن اور سنہ 1967ء کی جنگ کے دوران قبضے میں لیے گئے کسی بھی فلسطینی اور عرب علاقے پر اسرائیل کی خود مختاری تسلیم نہیں کی جائے گی۔
یورپی یونین کی سیاسی و سیکیورٹی پالیسی کے سینیر رکن جوزف بوریل کی جانب سے جاری بیان میں ایک باپھر سنہ 1967ء کی جنگ میں صہیونی ریاست کے قبضے میں آنے والے فلسطینی علاقوں کو اسرائیل میں ضم کرنے کے اقدامات کو سختی سے مسترد کرتے ہوئے کہا گیا ہے کہ قبضے میں لیے گئے کسی بھی فلسطینی اور عرب علاقے پر اسرائیل کی خود مختاری کو کسی بھی صورت تسلیم نہیں کیا جاسکتا ، یورپی یونین لک کا غرب اردن سے متعلق موقف واضح اور دوٹوک ہے، غرب اردن کو اسرائیل میں ضم کرنا بین الاقوامی قوانین اور عالمی قراردادوں کی خلاف ورزی ہو گی اور یورپی یونین ایسے کسی بھی اقدام کو ہرگز قبول نہیں کرے گی۔
واضح رہے کہ یہ پیشرفت ایک ایسے وقت میں سامنے آئی ہے جب اسرائیلی حکومت مقبوضہ مغربی کنارے کی یہودی کالونیوں اور وادی اردن کو صہیونی ریاست میں شامل کرنے کے منصوبے پر کام کررہی ہے۔ امریکا نےبھی اسرائیلی انتہا پسند اور نسل پرست حکومت کے اعلان کی حمایت کی ہے۔