(روز نامہ قدس ۔آنلائن خبر رساں ادارہ ) صیہونی ریاست کا مسجد اقصی پر دھاوا بولنا قابل مذمت ہے، اسرائیل کی جانب سے منظم طریقے سے بین الاقوامی اصولوں اور معاہدوں کی خلاف ورزی کی جا رہی ہے۔
سعودی وزارت خارجہ نے گذشتہ روز غیر قانونی صیہونی ریاست اسرائیل کے وزیر برائے قومی سلامتی ایتماربن گویر کی سرپرستی میں صیہونی آبادکاروں کے مسجد اقصیٰ پر منظم دھاوے کی شدید الفاظ میں مذمت کرتے ہوئے کہا ہے کہ غیر قانونی صیہونی ریاست اسرائیل کی جانب سے منظم طریقے سے بین الاقوامی اصولوں اور معاہدوں کی خلاف ورزی کی جارہی ہے۔
سعودی وزارت خارجہ نے اپنے ایک بیان میں کہا اس طرح کے اقدمات دنیا بھر کے مسلمانوں کے جذبات کو مشتعل کرنے کا باعث بن رہے ہیں۔ قابض اسرائیلی فوج ان زیادتی کو جاری رکھنے کے اثرات کی مکمل طور پر ذمہ دار ہے۔
سعودی عرب نے عالمی برادری پر زور دیا کہ وہ فلسطینی علاقوں سے اسرائیلی قبضہ ختم کرانے کی اپنی ذمہ داریاں ادا کرے۔ شہریوں کو ضروری تحفظ فراہم کرے اور فلسطین اسرائیل تنازع کے خاتمے کے لیے تمام تر کوششیں برائے کار لائے۔