(روز نامہ قدس ۔آنلائن خبر رساں ادارہ ) صیہونی فوج نے بارش کے پانی کو ذخیرہ کرنے کے لئے بنائے گئے تالابوں کا پانی بغیر کسی اطلاع کے غزہ میں چھوڑ دیا جس کے باعث فلسطینیوں کی کھڑی فصلیں تباہ ہوگئیں اور زرعی زمین زیرآب آگئی۔
ذرائع کے مطابق قابض صیہونی فوج نے اسرائیلی علاقوں میں بارش کے پانی کو جمع کرنے کیلئے غزہ کی سرحدکے قریب تعمیر کردہ تالابوں کے پانی کو اچانک غزہ میں چھوڑدیا جس کے باعث مشرقی الزیتون اور الشجائیہ میں کھڑی فصلیں تباہ ہوگئیں، فلسطینی کاشتکاروں نے مقامی میڈیا کو تفصیلات بتاتے ہوئے کہا ہے کہ اسرائیل ہماری فصلوں کو تباہ کرنے کیلئے اکثر اپنے تالابوں کا پانی اور کبھی سیوریج کے پانی کی کثیر مقدار بغیر کسی وجہ کے غزہ کی جانب چھوڑ دیتا ہے جس سے ناقابل تلافی نقصان ہوتا ہے۔
دوسری جانب صیہونی فوج نے فوجی بلڈوزروں کی مدد سے غزہ کے سرحدی علاقے دیر البلاہ میں سرحدی باڑ عبورکر کے تقریبا 300 میٹر تک فلسطینیوں کے کھیتوں کو ہموار کردیا۔
واضح رہے کہ صیہونی فوج اکثر غزہ میں سرحدی باڑ عبور کر کے فلسطینیوں کے کھیتوں کو تباہ کردیتی ہے اور کھیتوں میں کام کرنے والے کاشتکاروں کو بلاجواز فائرنگ کا نشانہ بتاتی رہتی ہے۔