(روزنامہ قدس ۔آنلائن خبر رساں ادارہ) صیہونی فوج نے شام میں ایرانی حمایت یافتہ جنگجوؤں کے ٹھکانوں نشانہ بنانے کا اعتراف کیا ہے
فلسطین پر قابض صیہونی ریاست اسرائیل نے شام کی سرحد کے قریب اسرائیل کے زیر قبضہ شامی علاقے گولان ہائیٹس کے نذدیک جنوب مغربی صوبہ القنیطرہ میں وحشیانہ بمباری کی ہے ، صیہونی ریاست کے اخبار یروشلم پوسٹ کے مطابق صیہونی فوج کا کہنا ہے کہ حملہ ایرانی حمایت یافتہ جنگجوؤں کی موجودگی کی اطلاع پر کیا گیا جو اسرائیل میں حملے کی منصوبہ بندی کررہے تھے
دوسری جانب شام کے سرکاری میڈیا نے حملوں کی تصدیق کی ہے تاہم مزید کوئی تفصیل نہیں بتائی۔ لبنان کے المیادین ٹیلی ویژن چینل نے اطلاع دی ہے کہ دروز آبادی کے قصبے حدر کے نزدیک اسرائیلی میزائل گرے ہیں۔
یہ قصبہ اسرائیل کے زیرقبضہ شام کے علاقے گولان کی چوٹیوں کے نزدیک واقع ہے۔لبنانی چینل نے بھی اسرائیل کے اس میزائل حملے کی مزید تفصیل نہیں بتائی ہے۔بعض اطلاعات کے مطابق القنیطرہ میں شامی صدربشارالاسد کی اتحادی ایران نواز ملیشیاؤں نے اپنے ٹھکانے بنا رکھے ہیں۔ ماضی میں بھی اسرائیلی فوج ان ایرانی ملیشیاؤں، حزب اللہ کے جنگجوؤں یا ایرانی کمانڈروں کواپنے حملوں میں نشانہ بنا چکی ہے۔