(روز نامہ قدس ۔آنلائن خبر رساں ادارہ ) قابض صیہونی فوج نے مقبوضہ بیت المقدس کے رہائشی ایک فلسطینی کو اپنا ہی گھر خود مسمار کرنے کا حکم دیا ہے اور حکم نہ ماننے کی صورت میں سنگین نتائج کے ساتھ ساتھ بھاری جرمانہ ادا کرنے کی دھمکی بھی دی ہے۔
مقبوضہ بیت المقدس کے علاقے شعفاط کے رہائشی محمد عبدالسلام البشتی کا کہنا ہے کہ گذشتہ روز قابض فوج کی بھاری نفری کی موجودگی میں اسرائیلی بلدیہ کے اہلکاروں نے اس کے مکان کا محاصرہ کیا اور اس کو خبردار کرتے ہوئے کہا کہ وہ اسی وقت اپنا مکان خود مسمار کرنا شروع کرے ورنہ اس کو اور اس کے گھر والوں کو قتل کرنے کے ساتھ ساتھ بھاری قیمت بھی چکانا پڑے گی۔
البشتی نے میڈیا کو بتایا کہ اسرائیلی حکام نے اسے زبردستی اس کا مکان مسمار کرادیا، اس نے کہا کہ اسرائیلی حکام اس کے خاندان کو جان سے مارنے کی دھمکیاں دے رہے تھے ، صہیونی حکام نے وارننگ دی تھی کہ اگر اس نے اپنا مکان خود نہ گرایا تو مکان گرانے پراٹھنےوالے تمام اخراجات جن کی مالیت لاکھوں شیکل بتائی گئی تھی جرمانہ کرنے کی دھمکی دی گئی تھی۔
واضح رہے کہ کسی فلسطینی شہری سے اس کا مکان اس کے اپنے ہاتھوں مسمار کرانے کا یہ پہلا واقعہ نہیں بلکہ آئے روز اس طرح کے ریاستی جبر کے واقعات رونما ہو رہے ہیں جس کے نتیجے میں فلسطینی شہری نہ صرف اپنے گھروں سے محروم ہو رہے ہیں بلکہ انہیں اپنے ہی ہاتھوں اپنے گھروں کو مسمار کرنا پڑ رہا ہے۔