(روز نامہ قدس ۔آنلائن خبر رساں ادارہ ) صیہونی آرمی چیف نے امریکا کو بھی دھمکی دیتے ہوئے کہا ہے کہ امریکا ایران کے ساتھ جوہری معاہدے میں دوبارہ شامل ہونے سے باز رہے ،ہم ایران پر دباؤ برقرار رکھنے کیلئے ہرممکن اقدام کریں گے۔
مقبوضہ فلسطین پر قابض صیہونی ریاست کے آرمی چیف لیفٹیننٹ جنرل ایویو کوچاوی نے اسرائیلی تھنک ٹینک سے خطاب کرتے ہوئےایران کو ایک بار پھر براہ راست دھمکی دیتے ہوئے کہا ہے کہ اسرائیلی آرمی کسی بھی وقت ایران پر حملے کو تیار ہے، فوج کو ایران کے خلاف ممکنہ کارروائی کے لیے تیار رہنے کا حکم دیا ہے۔
انھوں نے کہا کہ ایران کے پاس جوہری صلاحیت اسرائیل کیلئے انتہائی خطرناک ہے ہم کسی صورت بھی ایران کے جوہری صلاحیت کے حصول کے حق میں نہیں ہیں ، انھوں نے امریکی انتظامیہ کو بھی خبردار کرتے ہوئے کہا ہے کہ امریکی انتظامیہ ایران نیوکلیئر ڈیل میں شامل ہونے سے باز رہے، جوہری ڈیل میں شامل ہونے سے ایران جوہری ہتھیار بنانے کے قابل ہو گا۔
انھوں نے کہا کہ ہم غزہ اور لبنان کو بھی خبردار کرتے ہیں کہ وہ ایسے علاقوں کو خالی کردیں جہاں ہمارے خلاف اسلحہ ذخیرہ کیا جا رہا ہے اگر ایسا نہ کیا گیا تو ہماری فوج سخت حملے کے لیے تیار ہے۔