(روز نامہ قدس ۔آنلائن خبر رساں ادارہ ) صیہونی فوجیوں نے صیہونی آبادکاروں کی معاونت کرتے ہوئے قصبے کے داخلی راستوں کو بند کردیا اس دوران آبادکاروں نے مسلمانوں کے مقدس مقامات کی بے حرمتی کی اور ان کے تقدس کو پامال کیا۔
مقامی ذرائع کے مطابق گذشتہ رات درجنوں غیر قانونی صیہونی آبادکاروں نے مقبوضہ مغربی کنارے کے شہر سلفیت میں کفل حارث قصبے میں نبی ذُو ٱلْكِفْل اور نبی یوشع کے مزار پر یہودی مذہبی رسومات کی ادائیگی کے دوران مسلمانوں کے مذہبی مقامات پر دھاوا بولا اور مزار کے تقدس کو پامال کیا اس دوران صیہونی فوجیوں نے آبادکاروں کو تحفظ فراہم کرتےہوئے مسلمانوں کے مقدس مقامات کی بے حرمتی کیلئے کھلی چھوٹ دی اور قصبے کے داخلی راستوں کو بند کردیا گیا۔
بدھ کی رات سے جمعرات کی صبح تک جاری رہنے والی ان مذہبی رسومات اور مسلمانوں کے مقدس مقامات پر اشتعال انگیز دھاوؤں کے بعد فلسطینی باشندوں میں شدید غم و غصہ پایا جارہا ہے۔
واضح رہے کہ مقبوضہ مغربی کنارے اور مشرقی مقبوضہ بیت المقدس مں 700،000 سے زیادہ صیہونی آبادکار غیر قانونی صیہونی بستیوں میں مقیم ہیں اور سلفیت شہر کے شمال میں کچھ کلومیٹر کے فاصلے پر واقع، کفل حارث کی مجموعی آبادی 4،450 نفوس پر مشتمل ہے۔