(روزنامہ قدس ۔آن لائن خبر رساں ادارہ ) صہیونی فوج نے فلسطینی مزدوروں پر اس وقت حملہ کیا جب وہ اپنے کاموں میں مصروف تھے ، تمام مزدوروں کو ایک کنٹینر میں بند کرنے کے بعد زمین ہموار کرنے والی ہیوی مشینری سمیت دیگر تعمیراتی آلات کو ضبط کرلیا۔
مقبوضہ بیت المقدس کے شہر رام اللہ کے شمال مغربی گاؤں المزرعہ الغربیہ گاؤں کی میونسپلٹی کے ممبر وسیم الداودہ نے بتایا کہ گزشتہ روز صہیونی فوج نے گاؤں کے قریبی علاقے میں فلسطینیوں کی ایک کان پر حملہ کیا اور وہاں کام میں مصروف تمام مزدوروں کو ایک کنٹینر میں قیدکرنے کے بعد زمین کھودنے والی ہیوی مشینریز سمیت کام میں استعمال ہونے والے تمام چھوٹے بڑے آلات اور اوزاروں کو بلاجواز ضبط کرلیا ۔
انھوں نےبتایا کہ کان میں مصروف تمام فلسطینی قانونی اجازت نامے کے تحت کام کررہے تھے جن کو بلا جواز اور غیر قانونی طورپر حراست میں رکھا گیا جبکہ ان کی املاک کو بھی ضبط کیا گیا ۔
واضح رہے کہ صہیونی فوج اور پولیس کی جانب سے فلسطینیوں کے خلاف منظم انتقامی کارروائیوں کا مقصد فلسطینیوں پر عرصہ حیات تنگ کرنا اور انھیں اس زمین سے بے دخل کرنا ہے جس کے لئے صہیونی ریاست ہر طرح کے انتقامی حربے استعمال کرتی ہے ۔