(روزنامہ قدس ۔آن لائن خبر رساں ادارہ) ٹرمپ کا منصوبہ صدی کی ڈیل مشرقی وسطیٰ میں امن نہیں بلکہ بدامنی کا باعث بن سکتا ہے ، نام نہاد امن منصوبہ عالمی برادری کی ناکامی کا کھلا ثبوت ہے۔
تیونس کے سرکاری ٹی وی چینل کودیے گئے انٹرویومیں تیونیس کے صدر قیس سعید نے امریکی صدر ڈونلڈ ٹرمپ کی طرف سے مشرق وسطیٰ کے لیے پیش کردہ نام نہاد امن منصوبے ‘صدی کی ڈیل’ کو شدید تنقید کا نشانہ بناتے ہوئے تاریخ کی غیرمعمولی خیانت قرار دیا ہے۔
انھوں نے کہا کہ صدی کی ڈیل مشرقی وسطیٰ میں امن نہیں بلکہ بد امنی کا باعث بن سکتی ہے یہ منصوبہ عالمی برادری کی ناکامی کا کھلا ثبوت ہے، کسی بھی تنازع کو حل کرنے کی صورت میں دونوں فریقین کو شامل کیا جاتا ہے جبکہ اس جانبدار منصوبے میں فلسطینیوں کا کوئی کردار ہی نہیں اور نا ان کے کسی نمائندے کو اس کے اعلان کے موقع پر شامل کیا گیا جو ناقابل قبول ہے۔ اس طرح کا منصوبہ ذہنی اور فکری شکست خوردگی کی علامت ہے ۔