(روز نامہ قدس ۔آنلائن خبر رساں ادارہ ) صہیونی حکام کی کڑی پابندیوں اور کورونا وبا کی وجہ سے عائد کردہ رکاوٹوں کے باوجود مسجد اقصیٰ شب معراج کے موقعے پر فلسطینی مسلمانوں سے بھر گئی۔
تفصیلات کے مطابق گذشتہ روز قابض ریاست میں قبلہ اول میں شب معراج کے موقع پر مسجد اقصیٰ پر صہیونی حکام کی جانب سے لگائی گئی ہزاروں پابندیوں کے باوجود پچاس ہزار سے زائد فلسطینی مسلمانوں نے مسجد اقصیٰ میں حاضری دی اور مسجد کی تاریخی اہمیت کے حوالے سے اس شب کے روحانی فیض کو حاصل کیا۔
مسلمانوں کے پہلے قبلہ اول کی زیارت اور مقدس مقامات میں عبادت کےلیے فلسطینی شہری بیت المقدس کےتمام شہروں سےمسجداقصٰی پہنچےجبکہ سنہ 1948ء کے مقبوضہ علاقوں سے بھی فلسطینیوں کی بڑی تعداد نےمسجد اقصیٰ میں حاضری دی۔
مسجد اقصٰی میں معراج نبیﷺ کے حوالے سے خطاب کیا گیا جبکہ دینی سیشنز ہوئے جن میں مسلمانوں کے مسجد اقصٰی سے رشتے کو مضبوط کر نے اور اس کی حفاظت کو عین دینی فریضہ سمجھنے کی تعلیم دی گئی۔
واضح رہے کہ شب معراج سے ایک روز قبل مسجد اقصیٰ کے امام وخطیب الشیخ عکرمہ صبری کی جانب سے اپیل سامنے آئی تھی جس کی پاداش میں صہیونی فوج نے انہیں ایک روزہ حراست میں رکھنے کے بعد رہا کردیا تھا، الشیخ عکرمہ صبری نے شب معراج کے موقع پر بیت المقدس کے مسلمانوں سے بالخصوص اور پورے فلسطینی مسلمانوں سے بالعموم اپیل کی تھی کہ وہ مسجد اقصیٰ میں حاضری کو یقینی بنا کر قبلہ اول کے ساتھ اپنے ایمانی اور دینی رشتے کا اظہار کریں۔