رفح میں طبی عملے کا قتل عام: نیویارک ٹائمز نے صیہونی دعوے کا جھوٹ ثابت کردیا

(روز نامہ قدس ۔آنلائن خبر رساں ادارہ) امریکی اخبار نیویارک ٹائمز نے ایک ویڈیو جاری کی ہے جو ایک فلسطینی ایمبولینس اہلکار کے موبائل سے ملی، جو غیر قانونی صیہونی ریاست اسرائیل کے حملے میں شہید ہوا۔ 23 مارچ کو غزہ کے جنوبی شہر رفح میں، اسرائیلی فوج نے فلسطینی ہلال احمر اور سول ڈیفنس کی گاڑیوں کو نشانہ بنایا، جس میں 15 ریسکیو اہلکار شہید ہوئے۔

ویڈیو میں صاف دکھائی دیتا ہے کہ ایمبولینس اور فائر بریگیڈ کی گاڑیوں پر ہنگامی لائٹس روشن تھیں، اور وہ اپنی انسانی مدد کی ڈیوٹی انجام دے رہے تھے، جب انہیں جان بوجھ کر فائرنگ کا نشانہ بنایا گیا۔ یہ ویڈیو اسرائیلی ریاست کے ان دعووں کو جھٹلاتی ہے جن میں کہا گیا تھا کہ گاڑیاں مشکوک انداز میں بغیر لائٹس کے حرکت کر رہی تھیں۔

شہداء میں اقوام متحدہ کا ایک ملازم بھی شامل تھا۔ فلسطینی ہلال احمر نے اس واقعے کو انسانیت کے خلاف جرم قرار دیا ہے اور عالمی برادری سے فوری مداخلت کا مطالبہ کیا ہے۔