(روزنامہ قدس ۔آن لائن خبر رساں ادارہ)حماس کے رہنما کا کہنا ہے کہ صیہونی ریاست اور اس کے تمام ریاستی ادارے کورونا کی وبا سے فائدہ اٹھا کر اپنے ناپاک عزائم کو آگے بڑھانے اور القدس اور مسجد اقصیٰ کے حوالے اپنی سازشیں آگے بڑھا رہے ہیں۔
اسلامی تحریک مزاحمت (حماس) کے سیاسی شعبے کے سربراہ اسماعیل ھنیہ نے مسجد اقصیٰ میں صیہونی ریاست کی بڑھتی ہوئی کارروائیوں اور خطیب مسجد اقصیٰ الشیخ عکرمہ صبری کو مسجد اقصیٰ سے بے دخل کرنے کے اقدام کی شدید مذمت کرتے ہوئے اپنے سخت ردعمل میں کہا ہے کہ اسرائیل مسجد اقصیٰ کا تقدس پامال کرنے اور تاریخی حقائق کو مسخ کرنے کی سازش کررہا ہے۔
ایک بیان میں اسماعیل ھنیہ نے صیہونی ریاست کو متنبہ کرتےہوئے کہا ہے کہ ان کی جماعت غاصب صہیونیوں کی طرف سے مقدس مقام کی بے حرمتی کو ناکام بنائے گی اور قابض ریاست کے ناپاک عزائم کو خاک میں ملادے گی ، غاصب صہیونی قبلہ اول کے خلاف اپنی سازشوں کوآگے بڑھانے میں کامیاب نہیں ہوسکتے۔