(روزنامہ قدس ۔آن لائن خبر رساں ادارہ) مقبوضہ فلسطین کی مزاحمتی تحریک ،حماس اور اسلامی جہاد نے جرمنی کی جانب سے حزب اللہ کودہشتگرد جماعت قرار دینے کی شدید الفاظ میں مذمت کرتے ہوئے کہا ہے کہ دونوں جماعتیں حزب اللہ کے موقف کی حامی ہیں۔
اسلامی تحریک مزاحمت ‘حماس’ اور اسلامی جہاد نے جرمنی کی جانب سے لبنانی مزاحمتی تنظیم حزب اللہ کو دہشت گرد تنظیم قرار دینے کی مذمت کی ہے ، غزہ سے جاری مشترکہ بیان میں حزب اللہ کے ساتھ یکجہتی کا اظہار کرتے ہوئے کہا ہے کہ دونوں جماعتیں حزب اللہ کے موقف کے حامی ہیں۔
قبل ازیں ایران نے اپنی پرور دہ حزب اللہ کو جرمنی میں بلیک لسٹ کیے جانے کی شدید مذمت کی تھی۔ دو روز قبل جرمن حکومت نے حزب اللہ کو ایک غیرقانونی دہشت گرد گروہ قرار دیتے ہوئے اسے بلیک لسٹ کردیا تھا۔ایران نے برلن حکومت کے اس فیصلے پر سخت رد عمل ظاہر کرتے ہوئے کہا کہ حزب اللہ کو دہشت گرد قرار دینا ‘امریکی ۔ صہیونی’ پروپیگنڈے کا حصہ ہے اور جرمنی کو اس فیصلے کے نتائج کا سامنا کرنا پڑے گا۔