جبالیا النزلہ کی بلدیہ نے انکشاف کیا ہے کہ قابض اسرائیل کی غزہ پر مسلط کردہ جنگ سے ہونے والی تباہی کے نتیجے میں بلدیہ کے نظامِ دیکھ بھال اور آپریشن میں 80 فیصد تک کمی واقع ہوئی ہے، جس کے باعث شہر میں پانی کے کنوؤں، نکاسیٔ آب کے پمپوں، سڑکوں کی روشنی اور دیگر بنیادی شہری سہولیات کا نظام تقریباً مفلوج ہو چکا ہے۔
مرکزاطلاعات فلسطین کو موصول بیان میں بلدیہ نے واضح کیا کہ نظام کو فوری طور پر دوبارہ فعال کرنے کے لیے ہنگامی امدادی منصوبوں کی اشد ضرورت ہے، جن میں موبائل پمپ، نکاسیٔ آب کے مین ہولز کی صفائی کے لیے پمپ، پانی کے کنوؤں کو چلانے کے لیے 110 سے 220 کلو وولٹ ایمپیئر کی گنجائش والے بجلی کے جنریٹر، 25 ہارس پاور کی گنجائش والے سبمرسیبل پمپ، اور بھاری مشینری شامل ہیں تاکہ کنوؤں اور سیوریج اسٹیشنوں کو دوبارہ فعال کیا جا سکے۔
بیان میں مزید کہا گیا ہے کہ بلدیہ کو سڑکوں کی روشنی کے منصوبوں کی بحالی اور بجلی کے آلات کی فراہمی کے لیے بھی فوری امداد کی ضرورت ہے کیونکہ قابض اسرائیل کے وحشیانہ بمباری اور وسیع تباہی نے جبالیا کی روشنی کے نظام کو مکمل طور پر 100 فیصد تباہ کر دیا ہے۔
جبالیا النزلہ کی بلدیہ نے تمام متعلقہ اداروں، عالمی تنظیموں اور امدادی انجمنوں سے فوری طور پر متحرک ہونے کی اپیل کی ہے تاکہ مرمت اور آپریشن کے نظام کی بحالی میں مدد دی جا سکے، شہریوں کو بنیادی سہولیات دوبارہ فراہم کی جا سکیں اور اس برباد شہر میں زندگی کی رمق واپس لائی جا سکے، جو قابض اسرائیلی جنگ کے نتیجے میں ملبے کے ڈھیر میں تبدیل ہو چکا ہے۔
