(روزنامہ قدس ۔آن لائن خبر رساں ادارہ) بیرون ممالک پھنسے ہوئے طلباء کا کہنا ہے کہ فلسطینی وزیرخارجہ بیرون ممالک میں موجود شہریوں کے حوالے سے اقدامات کرنے میں بالکل ناکام ہوگئے ہیں وہ اپنے عہدے کیلئے نا اہل ہیں جس پر انھیں فوری طور پر مستعفی ہوجانا چاہئے۔
فلسطینی اتھارٹی کی طرف سے عالمی وباء کورونا وائرس کے کی وجہ سے بیرون ملک پھنسے طلبا کی وطن واپسی کے حوالے سے خاطر خواہ اقدامات نہ کیے جانے پر بیرون ممالک میں پھنسے طلبہ کی جانب سے رام اللہ اتھارٹی کے عہدیداروں بالخصوص وزیرخارجہ ریاض المالکی کے خلاف سخت برہمی کا اظہار کیا جارہا ہے۔
بیرون ممالک فلسطینی طلبا نے سوشل میڈیا پر ” ہمیں ہمارے گھروں کو واپس بھیجا جائے” کے عنوان سے مہم شروع کی ہے۔ اس مہم میں حصہ لینے والے فلسطینی طلبا نے وطن واپسی کے حوالے سے اقدامات نہ کرنے پر رام اللہ اتھارٹی کے وزیرخارجہ ریاض الماکی سے مستعفی ہونے کا مطالبہ کیا ہے۔
مہم میں وزیرخارجہ ریاض المالکی سے کہا گیا ہے کہ وہ بیرون ملک پھنسے شہریوں کی وطن واپسی کے لیے اقدامات کرنے میں ناکامی پر استعفیٰ دیں۔ اس کے ساتھ ساتھ انہوں نے فلسطینی اتھارٹی سے مطالبہ کیا ہے کہ بیرون ملک پھنسے طلبا اور دوسرے شہریوں کی واپسی میں کوتاہی برتنے والے تمام عہدیداروں کو برطرف کرکے ان کے خلاف سخت قانونی کارروائی عمل میں لائی جائے۔
واضح رہے کہ کرونا وبا کی وجہ سے دوسرے ممالک میں زیرتعلیم ہزاروں فلسطینی طلبا سنگین مشکلات سے دوچار ہیں۔ فضائی سروسز کی بندش کے نتیجے میں طلبا کی واپسی مسلسل ملتوی ہو رہی ہے۔