(روز نامہ قدس ۔آنلائن خبر رساں ادارہ )جوبائیڈن انتظامیہ کے وزیرخارجہ کے امیدوار انتھونی بلنکن مسلسل ایسے بیانات دے رہے ہیں جن سے فلسطینی قوم کے حقوق کے خلاف ان کی پالیسی واضح ہو رہی ہے۔
مقبوضہ فلسطین میں صیہونی مظالم کے خلاف برسرپیکار اسلامی تحریک مزاحمت حماس کے ترجمان حازم قاسم نے نو منتخب امریکی صدر جو بائیڈن کے سیکریٹری برائے خارجی امور انتھونی بلنکن کے بیا ن کی شدید الفاظ میں مذمت کی ہے جس میں انھوں نے کہا ہے کہ ان کی حکومت مقبوضہ بیت المقدس کو صیہونی ریاست کا دارالحکومت قرار دینے کے سابق صدر ڈونلڈ ٹرمپ کے فیصلے پرقائم رہے گی۔
انھوں نے کہا کہ بلنکن کا بیان مقبوضہ بیت المقدس کو قابض ریاست اسرائیل کا دارالحکومت تسلیم کرنا اور شہر میں اپنے ملک کا سفارتخانہ رکھنے کے بارے میں موقف پر قائم رہنا واضح طور پر بین الاقوامی قانون اور فیصلوں کی خلاف ورزی ہے۔
انہوں نے مزید کہا کہ یہ بیان ہماری قوم کو ان کی زمین اور حرمت کے بارے میں قائم کردہ حقوق کی نفی اور سرکاری اور مقبول سطح پر پورے عرب نظام کو نظرانداز کرنے کی دانستہ کوشش ہے۔انہوں نے مزید کہا کہ جوبائیڈن کے وزیر خارجہ مسلسل ایسے بیانات دے رہے ہیں جن سے فلسطینی قوم کے حقوق کے حوالے سے ان کی پالیسی واضح ہو رہی ہے۔