(روز نامہ قدس ۔آنلائن خبر رساں ادارہ ) امریکی کانگریس کے اراکین نے صدر سے مطالبہ کیا کہ وہ فلسطینیوں کے خلاف اسرائیل کی انتقامی کارروائیوں کا جائزہ لیں اور رہائشی مکانات کی مسمار ی کی تحقیقات کاآغاز کریں۔
عرب میڈیا ذرائع کے مطابق امریکی کانگریس کے بعض اراکین نے امریکی صدر جو بائیڈن اور محکمہ خارجہ کو ایک خط لکھا ہے جس میں مقبوضہ فلسطین میں صیہونی ریاست کی جانب سے رہائشی مکانات کی مسمار ی کی پالیسی کے بارے میں اپنی تشویش کا اظہار کیا گیا ہے اور مطالبہ کیا ہے کہ وہ انہدامی کارروائیوں میں امریکی سازوسامان کے استعمال کی تحقیقات کرے اور فلسطینیوں کے مکانات کی مسماری کی تحقیقات کا آغاز کرے اور یہ فیصلہ کرے کہ آیا اس سامان کو "اسلحہ ایکسپورٹ کنٹرول” قانون کی خلاف ورزی میں استعمال کیا گیا تھا۔
اراکین نے اس کے ساتھ ساتھ سابق صدر ڈونلڈ ٹرمپ کی طرف سے جاری کردہ سینچری ڈیل کو منسوخ کرنے کا مطالبہ کیا ہے اور کہا ہے کہ "اسرائیل” مقبوضہ فلسطینی علاقوں میں شہریوں کے لئے صحت سے متعلق حفاظتی اقدامات کی فراہمی کے سلسلے میں چوتھے جنیوا کنونشن کے تحت اپنی ذمہ داریاں پوری نہیں کررہا ہے۔