(روزنامہ قدس ۔آن لائن خبر رساں ادارہ) ترجمان حماس کا کہنا ہے کہ یحییٰ السنوار کی طرف سے اسرائیل کے ساتھ قیدیوں کے تبادلے کے لیے جو فارمولہ پیش کیا گیا ہے اس پرجماعت کی پوری قیادت کا اتفاق ہے حماس کی پیشکش سے فائدہ اٹھانے کا اسرائیل کے پاس ایک اور موقع ہے۔
اسلامی تحریک مزاحمت ‘حماس’ کے ترجمان حازم قاسم کی طرف سے جاری ایک بیان میں کہا گیا ہے کہ غزہ شہر میں حماس کے سربراہ یحییٰ السنوار کی طرف سے اسرائیل کے ساتھ قیدیوں کے لیے ایک نئی ڈیل کی پیش کش پرحماس کو کوئی اعتراض نہیں، حماس اس فارمولے کی مکمل حمایت کرتی ہے فیصلہ اسرائیل کو کرنا ہے کہ وہ اس پیشکش سے فایدہ اٹھاتا ہے یا ایک بار پھر راہ فرار اختیار کرتا ہے۔
ترجمان نے کہا کہ حماس نےانسانی بنیادوں پر اسرائیل کو قیدیوں کے تبادلے کی ایک نئی اور لچک دار پیش کش کی ہےاب گیند اسرائیل کے کورٹ میں ہے۔
واضح رہے کہ حال ہی میں حماس رہ نما یحییٰ السنوار نے ایک انٹرویو میں اسرائیل کو پیش کش کی تھی کہ وہ جیلوں میں قید عمر رسیدہ اور بیمار، بچوں اور خواتین کو رہا کرے اور اس کے بدلے میں حماس غزہ کی پٹی میں جنگی قیدی بنائے گئے اسرائیلیوں کو رہا کردے گا۔