(روزنامہ قدس ۔آن لائن خبر رساں ادارہ) فلسطین کی سپریم علماء کونسل کا کہنا ہے کہ ایسے ٹی وی ڈرامے جن میں اسرائیل کے ساتھ دوستی کی بات کی گئی ہو مسلمان اور عرب ممالک کے ٹی وی چینلوں پرنشر کرنا شرمناک ہے۔
غزہ میں فلسطین کی سپریم علماء کونسل کے چیئرمین مروان ابو راس نے دیگر علماء کے ساتھ مشترکہ پریس کانفرنس کرتے ہوئے عرب ٹی وی چینلوں پر قابض ریاست اسرائیل سے دوستانہ تعلقات استوار کرنے کی ترغیب دینے والے ڈرامے اور فلموں کی مذمت کرتے ہوئے کہا ہے کہ صہیونی لابی ہے اور وہ عرب اور مسلمان ممالک کے ذرائع ابلاغ کو اپنے مذموم مقاصد کے لیے استعمال کررہی ہے۔
انھوں نے قابض ریاست کے ساتھ دوستی پر مبنی فلموں اور ٹی وی ڈراموں کو دیکھنے سے منع کرتے ہوئے ان کے بائیکاٹ کا مطالبہ کیا اور کہا کہ ایسے ڈرامے نشر کرنا جرم اور ان کو دیکھا حرام ہے ۔
مشترکہ پریس کانفرنس میں علماء کا کہنا تھا کہ ان ٹی وی ڈراموں اور فلموں میں نہ صرف اسلامی تاریخ کومسخ کیا گیا بلکہ عرب ممالک کے اصولوں اور روایات کی بھی توہین کی جا رہی ہے۔ بدقسمتی سے ان ڈراموں کے پیچھے حکومتی ادارے اور شخصیات سرگرم ہیں جو اسرائیل کے ساتھ عرب ممالک کی دوستی کی راہ ہموار کررہے ہیں۔