(روزنامہ قدس ۔آن لائن خبر رساں ادارہ) اسلامی جہاد کے سینئر رکن کا کہنا ہے کہ عالمی برادری کورونا وائرس کی وباء میں مصروف ہے جبکہ صیہونی ریاست عالمی افراتفری کی صورت حال سے ناجائز فائدہ اٹھاتے ہوئے بیت المقدس میں اپنے توسیع پسندانہ اقدامات او مذموم عزائم کو فروغ دے رہا ہے۔
مقبوضہ فلسطین میں صیہونی مظالم کے خلاف برسرپیکار مزاحمتی تحریک اسلامی جہاد کے سیاسی شعبے کے سینئررکن محمد الھندی نے غزہ سے جاری اپنے ایک بیان میں عالمی برادری کی توجہ صیہونی توسیع پسندانہ عزائم کی جانب مبذول کراتے ہوئے کہا ہے کہ مقبوضہ فلسطین سے کورونا وائرس کے باعث عالمی توجہ ہٹنے ہی قابض صیہونی ریاست اسرائیل القدس کا تاریخی تشخص تبدیل کرنے کی سازش کر رہا ہے۔
انھوں نے کہا کہ اس میں کوئی شبہ نہیں دشمن حالیہ عالمی صورت حال سے ناجائز فائدہ اٹھا کر القدس کے تاریخی اسلامی تشخص کو تبدیل کرنے کی سازش کررہا ہے اور مسجد اقصیٰ اسرائیل کا ایک خاص ہدف ہے اور اسرائیل مسجد اقصیٰ پر اپنا قبضہ مسلط کرنے کی کوشش کررہا ہے۔