مقبوضہ بیت المقدس ۔ روزنامہ قدس ـ آنلائن خبر رساں ادارہ
قابض اسرائیلی وزارتِ خزانہ کے تازہ اعداد و شمار سے انکشاف ہوا ہے کہ گذشتہ دو برسوں کے دوران غزہ کے خلاف جاری صہیونی نسل کشی کی جنگ پر 76.3 ارب ڈالر خرچ کیے جا چکے ہیں۔ یہ اعداد و شمار عبرانی نشریاتی ادارے کی رپورٹ میں سامنے آئے ہیں۔
رپورٹ کے مطابق وزارتِ خزانہ کی جانب سے فراہم کردہ تازہ ترین تفصیلات میں کہا گیا ہے کہ اب تک قابض اسرائیل کے جنگی اخراجات کی مجموعی مالیت 250 ارب شیکل یعنی تقریباً 76.3 ارب ڈالر تک پہنچ گئی ہے۔
عبرانی نشریاتی ادارے نے مزید بتایا کہ وزارتِ خزانہ کے اعلیٰ حکام نے انکشاف کیا ہے کہ قابض اسرائیلی دفاعی ادارے نے جنگ کے دوران ریزرو فورسز کے دنوں کا غلط استعمال کیا، جس کے نتیجے میں اربوں شیکل کا ضیاع ہوا۔ ان کا اشارہ ان بھاری انعامات اور بونسز کی طرف تھا جو قابض فوج کے ریزرو اہلکاروں کو ان کی سروس کے دوران دیے گئے۔
قابض اسرائیل کے وزیرِ خزانہ بزلئیل سموٹریچ نے منگل کے روز ایک پریس کانفرنس میں کہا تھا کہ "معیشت کی ترقی کے لیے دفاعی بجٹ میں اضافہ ناگزیر ہے”۔ انہوں نے واضح کیا کہ آنے والے برسوں میں قابض اسرائیل کی معیشت کو برقرار رکھنے کے لیے عسکری اخراجات کو مزید بڑھانا ہوگا۔
رپورٹ کے مطابق وزارتِ خزانہ کے فراہم کردہ اعداد و شمار میں یہ واضح نہیں کیا گیا کہ یہ اخراجات کس جنگ کے تحت شمار کیے گئے ہیں، تاہم قابض اسرائیلی حکام متعدد بار یہ دعویٰ کر چکے ہیں کہ وہ بیک وقت کئی محاذوں پر لڑ رہے ہیں۔ غالب امکان ہے کہ یہ اعداد و شمار غزہ کے خلاف وحشیانہ جارحیت کے ساتھ ساتھ لبنان اور ایران پر کیے گئے حملوں کے اخراجات کو بھی شامل کرتے ہیں۔
ماہرین کے مطابق قابض اسرائیل کی اس جنگی مہم نے نہ صرف ہزاروں بے گناہ فلسطینیوں کی جانیں لیں بلکہ اس کے اپنے معاشی نظام کو بھی ہلا کر رکھ دیا ہے۔ دفاعی بجٹ کے لامتناہی اخراجات نے صہیونی معیشت کو تباہی کے دہانے پر پہنچا دیا ہے، جب کہ دوسری جانب غزہ میں تباہی، بھوک، بیماری اور انسانی المیہ اپنی انتہا کو پہنچ چکا ہے۔
