(روز نامہ قدس ۔آنلائن خبر رساں ادارہ ) شرپسند مسلح صیہونی آبادکاروں نے فلسطینی گلہ بانوں پرلاٹھیوں اور ڈنڈوں سے حملہ کیا جس کے نتیجے میں بزرگ فلسطینی سمیت 4 فلسطینی شہری شدید زخمی ہوگئے۔
مقامی ذرائع سے حاصل اطلاعات کےمطابق مقبوضہ بیت المقدس کے شہر نابلس کے مضافاتی قصبے عقربا میں شرپسند صیہونی آبادکاروں کے مسلح گروپ نے اسرائیلی فوجی کی سرپرستی میں فلسطینی گلہ بانوں پر اس وقت لاٹھیوں اور ڈنڈوں سےحملہ کردیا جب وہ اپنے مویشوں کے ہمراہ چرا گاہوں میں تھے، حملے میں بزرگ فلسطینی شہری سمیت 4 افراد زخمی ہوگئے جن کو اپنی مدد آپ کے تحت قریبی اسپتال منتقل کیا گیا۔
واضح رہے کہ رواں ماہ شرپسند غیر قانونی صیہونی آبادکاروں کی جانب سے یہ چھٹا بڑا حملہ ہے جس میں اب تک 14 فلسطینی زخمی ہوچکے ہیں جبکہ آبادکاروں کی جانب سے فلسطینیوں کی املاک اور باغوں پر بھی حملے کیئے گئے، گذشتہ ہفتے میں صیہونی آبادکاروں نے فلسطینیوں کے زیتون کے باغ کو اجاڑتے ہوئے ڈیڑھ سو کے قریب پھلدار درختوں کو تباہ کیا تھا۔
