(روزنامہ قدس ۔آن لائن خبر رساں ادارہ) حماس کے سینئر رہنما کا کہنا ہے کہ حماس نےصدارتی انتخابات کی تیاری کیلئے انتظامی کمیٹی کوحتمی شکل دے دی ہے، قوم کے وسیع تر مفادات کیلئے فلسطینی انتخابات میں بھرپورطریقے سے حصہ لیں گے۔
اسلامی تحریک مزاحمت ‘حماس’ کے سینیر رہ نما اسامہ المزینی نے غزہ میں حماس کے 32 ویں یوم تاسیس کے حوالے سے منعقدہ ایک اجتماع سے خطاب کرتےہوئے کہا ہے کہ حماس غزہ کی پٹی پر اسرائیلی ریاست کی طرف سے مسلط کردہ محاصرے کے خاتمے کے لیے ہرممکن کوشش کررہی ہے، حماس نے قومی وحدت کے لیے بہت زیادہ لچک کا مظاہرہ کرتے ہوئے پارلیمانی اور صدارتی انتخابات کی تیاری کے لیے انتظامی کمیٹی کو حتمی شکل دے دی ہے ۔
انہوں نے کہا کہ حماس قوم کے وسیع تر مفادات کے لیے حماس فلسطینی انتخابات میں حصہ لے رہی ہے گی جبکہ قابض ریاست کے خلاف مسلح جہاد کا سفر بھی جاری رکھے گی۔
حماس رہ نما نے عرب ممالک کی طرف سے اسرائیل کے ساتھ دوستانہ مراسم کے قیام کی کوششوں کی شدید مذمت کی اور کہا کہ عرب ممالک کی طرف سے فلسطینی قوم کے حقوق اور فلسطینی کاز کی قیمت پر اسرائیل کےساتھ تعلقات استوار کرنا فلسطینی قوم کی قربانیوں کی توہین ہے۔انہوں نے کہا کہ حماس غزہ کی پٹی پرمسلط کردہ معاشی پابندیوں کے خاتمے کے لیے ہرسطح پر جدو جہد جاری رکھے گی۔