(روز نامہ قدس ۔آنلائن خبر رساں ادارہ ) صیہونی ریاست کی خفیہ ایجنسی نے اسرائیل سے ایک ایسے گروہ کو گرفتارکیا ہے جس نے ایک ملک کے لیے اسرائیل کا جدید ترین میزائل سسٹم غیر قانونی طورپر تیار کیا اس کو ٹیسٹ کیا اور فروخت بھی کردیا۔
فلسطین پرقابض غیرقانونی صیہونی ریاست اسرائیل کے معروف اخبار ہاریتز میں شائع رپورٹ کے مطابق صیہونی ریاست کی داخلی سلامتی کے ادارے شاباک نے پولیس کے ہمراہمقبوضہ بیت المقدس کے مختلف شہروں سے دفاعی، عسکری امور کے ماہرین اور دفاعی انڈسٹری کے سابقہ ملازمین سمیت 20 ایسے افراد کو گرفتار کیا ہے جو غیر قانونی طور پر ایک ایسے ملک کو صیہونی ریاست اسرائیل کا جدید ترین میزائل سسٹم فروخت کرنے میں ملوث پائے گئے ہیں۔
شاباک کی جانب سے ابتدائی تحقیقات میں یہ بات سامنے آئی ہے کہ گرفتار ملزمان نے نہ صرف میزائل کو غیرقانونی طور پر تیار کیا، اس کو ٹیسٹ کیااور پھر اس کو ایک ملک کو فروخت بھی کردیا، تحقیقات میں اس ملک کا نام ظاہر نہیں کیا گیا ہے تاہم یہ ضرور بتایا گیا ہے کہ وہ ملک ایشائی ہے۔