(روز نامہ قدس ۔آنلائن خبر رساں ادارہ ) اسرائیلی حکومتی نمائندے نے کہا ہے کہ حزب اللہ باقاعدگی سے حساس علاقے میں گشت کرتی ہے اور اسرائیلی فوجی سرگرمیوں کے بارے میں معلومات جمع کرتی ہے۔
صہیونی ریاست کے معروف اخبار یروشلم پوسٹ کے مطابق گذشتہ روز اقوام متحدہ میں صہیونی حکومت کے نمائندے گیلڈ ایردان نے سلامتی کونسل کو ایک خط لکھا جس میں مطالبہ کیا گیا ہے کہ وہ لبنان میں حزب اللہ مزاحمتی تحریک پر دباؤ بڑھائے۔
اقوام متحدہ میں صہیونی حکومت کے نمائندے کی جانب سےخط میں حزب اللہ کی فوجی صلاحیت کے بارے میں تشویش کا اظہار کرتے ہوئے یہ دعویٰ کیا ہے کہ حزب اللہ اور اس کی فوجی سرگرمیوں کو مسلسل مضبوط بنانے کے سنگین نتائج برآمد ہونے کا امکان ہے، جس میں دونوں فریقوں کے مابین بڑے پیمانے پر دشمنیوں کا دوبارہ آغاز بھی شامل ہے۔
گیلڈایردان نے حزب اللہ کی طاقت کا اعتراف کرتے ہوئے مزید کہا کہ (وہ) بلیو لائن کے ساتھ ساتھ وسیع پیمانے پر فوجی تنصیبات اور پوزیشنوں کا انتظام جاری رکھے ہوئے ہیں۔ حزب اللہ باقاعدگی سے اس علاقے میں گشت کرتی ہے اور اسرائیلی فوجی سرگرمیوں کے بارے میں معلومات جمع کرتی ہے۔
واضح رہے اس سے قبل اسرائیلی فوج کے داخلی محاذ کے کمانڈر اوری گارڈین نے حزب اللہ کی میزائل صلاحیت کا اعتراف کرتے ہوئے کہا تھا کہ مستقبل میں ممکنہ لڑائی کی صورت میں اسرائیل پر روزانہ لگ بھگ 2 ہزار میزائل اور راکٹ فائر کیے جائیں گے۔