(روز نامہ قدس ۔آنلائن خبر رساں ادارہ ) اردنی وزیراعظم اور مصری صدر نے ملاقات میں مسئلہ فلسطین کے دیرینہ تنازع کے حل سمیت مشرق وسطیٰ میں قیام امن کیلئے ہونے والی کوششوں اور پیش رفت پر تفصیلی گفتگو کی ۔
گذشتہ روز اردنی وزیراعظم بشر الخصاونہ نے قاہرہ میں مصری صدر عبدالفتاح السیسی سے صدارتی محل میں ملاقات کی دونوں بڑے عرب ملکوں کے رہنماؤنے کہا ہے کہ قاہرہ اور عمان تنازع فلسطین کو اقوام متحدہ کی قراردادوں اور بین الاقوامی قوانین کے تحت حل کرنے اور فلسطینیوں اور اسرائیل کے درمیان تعمیری اور بامقصد بات چیت کی بحالی پر زور دیتے ہیں تاکہ برسوں سے چلے آرہے اور دیرینہ تنازع کا کوئی حل نکالا جاسکے۔
مصری صدر السیسی اور وزیراعظم الحصاونہ کے درمیان ہونے والی بات چیت میں دہشتگردی کے خلاف جنگ میں مل کر کوششیں جاری رکھنے، انتہا پسندی کی روک تھام، دو طرفہ تجارتی حجم میں اضافے اور مصر، اردن اور عراق پر مشتمل سہ فریقی تعاون فرویم ورک کو موثر بنانے پر بھی تبادلہ خیال کیا گیا۔اردنی وزیر اعظم بشر الحصاونہ نے شاہ عبداللہ دوم کی طرف سے مصری صدر کے نام بھیجا ایک زبانی پیغام بھی ان تک پہنچایا۔