ایک بیان میں وزیراعلیٰ سندھ کی معاون خصوصی برائے میڈیا نے کہا کہ آج انسانیت کے دعویدار کہاں ہیں جبکہ ایک بار پھر معصوم فلسطینیوں کو خون میں نہلایا جا رہا ہے، انسانیت کا تقاضا ہے کہ ظلم کے اس باب کو فوری طور پر بند کیا جائے۔
وزیراعلیٰ سندھ کی معاون خصوصی برائے میڈیا شرمیلا فاروقی نے اقوام عالم اور خاص طور پر یورپی ممالک اور امریکہ سے مطالبہ کیا ہے کہ وہ غزہ پر اسرائیلی وحشیانہ حملوں کو بند کروائیں۔ یہ بات انہوں نے اپنے جاری ہونے والے ایک بیان میں کہی۔ انہوں نے کہا کہ سیاسی و مذہبی جماعتوں کی اسرائیلی جارحیت پر خاموشی انتہائی افسوسناک ہے۔ انہوں نے کہا کہ فلسطینی عوام ظلم کی چکی میں پس رہے ہیں ان مظالم کے خاتمے کے لئے تمام اسلامی ممالک اور یورپی ممالک اپنا مثبت کردار ادا کریں۔ شرمیلا فاروقی نے مزید کہا کہ فلسطینی مسلمان ایک طویل عرصے سے اسرائیلی جارحیت اور مظالم کا شکار ہیں لیکن عالم اقوام کی بے حسی کے باعث معصوم فلسطینی بچے، عورتیں اور مرد موت کا شکار ہو رہے ہیں اور یہ مظالم دن بدن بڑھتے ہی جا رہے ہیں۔
وزیراعلیٰ سندھ کی معاون خصوصی نے کہا کہ آج انسانیت کے دعویدار کہاں ہیں جبکہ ایک بار پھر معصوم فلسطینیوں کو خون میں نہلایا جا رہا ہے۔ انہوں نے کہا کہ انسانیت کا تقاضا ہے کہ ظلم کے اس باب کو فوری طور پر بند کیا جائے۔ انہوں نے کہا کہ اسرائیلی وحشیانہ حملوں کے باعث عالم اسلام میں شدید غم و غصہ کی لہر پائی جاتی ہے اس جارحیت کے خلاف امن و انسانیت سے محبت کرنے والے ہر فرد کو شدید احتجاج کرنا چاہیے۔