ملت فلسطین اتحاد کے ذریعے اپنے عظیم مقاصد حاصل کر لے گی، احمدی نژاد

 تحریک جہاد اسلامی فلسطین کے سیکرٹری جنرل سے ٹیلیفونک گفتگو میں ایرانی صدر کا کہنا تھا کہ ملت ایران صیہونی جارحیت کے مقابلے میں مزاحمت اور غزہ کے باشندوں کی درخشان کامیابی کی مبارکباد پیش کرتی ہے اور ملت فلسطین کے تمام مقاصد کے حصول کی آرزو مند ہے۔
 اسلامی جمہوری ایران کے صدر ڈاکٹر محمود احمدی نژاد نے فلسطینی گروہوں کے اتحاد کو ملت فلسطین کے مقاصد کے حصول کے راستے میں ایک اہم قدم قرار دیا ہے۔ ایرانی صدر نے کل تحریک جہاد اسلامی فلسطین کے سیکرٹری جنرل رمضان عبداللہ شلح کے ساتھ ٹیلی فونی گفتگو کے دوران فلسطینی گروہوں کے باہمی اتحاد کی ضرورت پر تاکید کرتے ہوئے کہا کہ غاصب اسرائیل کی جانب سے غزہ پر مسلط کی جانے والی آٹھ روزہ جنگ میں اسلامی تحریک مزاحمت کی کامیابی سے یہ بات ثابت ہوچکی ہے کہ اتحاد کے ذریعے ملت فلسطین اپنے عظیم مقاصد حاصل کر لے گی۔

ڈاکٹر احمدی نژاد نے مزید کہا کہ ملت ایران صیہونی جارحیت کے مقابلے میں استقامت اور غزہ کے باشندوں کی درخشان کامیابی کی مبارکباد پیش کرتی ہے اور ملت فلسطین کے تمام مقاصد کے حصول کی آرزو مند ہے۔ رمضان عبداللہ شلح نے بھی اس ٹیلی فونی گفتگو کے دوران ملت ایران اور امت اسلامیہ کو آٹھ روزہ جنگ میں صیہونی حکومت کے مقابلے میں فلسطینیوں کی فتح و کامیابی کی مبارکباد پیش کرتے ہوئے کہا کہ فلسطینی اس کامیابی کو ایران کی حکومت اور ملت کی ہمہ گیر حمایت کا رہین منّت جانتے اور اس کی قدردانی کرتے ہیں۔