غزہ کی پٹی میں جمعہ کے روز ہزاروں افراد نے اسرائیلی جیلوں میں بھوک ہڑتالی فلسطینی اسیران کے ساتھ اظہار یکجہتی کے لیے ایک بڑا جلوس نکالا۔ احتجاجی جلوس کی کال فلسطین کی منظم مذہبی اور سیاسی تنظیم اسلامی تحریک مزاحمت "حماس” کی جانب سے کیا گیا تھا۔
مرکزاطلاعات فلسطین کے مطابق غزہ کی پٹی میں یہ احتجاجی مظاہرہ ایک ایسے وقت میں کیا گیا ہے جب دوسری جانب فلسطین بھرمیں سترہ اپریل کو "یوم اسیران فلسطین” منانے کی تیاریاں زوروں پرہیں۔
غزہ کی پٹی کے وسط میں منعقدہ اس احتجاجی جلسے میں شہرکی کئی بڑی جامع مساجد سے ہزاروں افراد کی ریلیاں شامل ہوئیں۔ مظاہرین نے ہاتھوں میں کتبے ، بینرز اور حماس کے پرچم اٹھا رکھے تھے۔ کتبوں پر فلسطینی بھوک ہڑتالی اسیران کے ساتھ یکجہتی اور اسرائیل کی مخالفت میں نعرے درج تھے۔
مظاہرین نے اسرائیلی مظالم کےخلاف بھی شدید نعرے بازی کی۔ مظاہرین سخت مشتعل دکھائی دے رہے تھے اور وہ آزادی کے لیے مسلح جہاد کے حق میں بھی نعرے بازی کر رہے تھے۔
احتجاجی جلوس سے حماس کی قیادت، سابق اسیران اور انسانی حقوق کے مندوبین نے بھی خطابات کیے اور اسرائیلی حکومت کی فلسطینی اسیران کے خلاف معاندانہ پالیسیوں کی شدید الفاظ میں مذمت کی۔ مقررین کا کہنا تھا کہ اسرائیلی جیلوں سے فلسطینی اسیران کی رہائی کا اہم راستہ اسرائیلی فوجیوں کی گرفتاریاں ہیں۔ فلسطینی مزاحمت کاروں کو چاہیے کہ وہ مزید اسرائیلی فوجیوں کویرغمال بنائیں تاکہ ان کے بدلے میں فلسطینی اسیران کی رہائی کو ممکن بنایا جا سکے۔
بشکریہ: مرکز اطلاعات فلسطین