فلسطینی مجلس قانون ساز کے اسپیکر ڈاکٹر عزیزدویک نے کہ سعودی عرب کے شہر جدہ میں جاری اسلامی سربراہی کانفرنس سے مطالبہ کیا ہے کہ وہ فلسطینیوں کی توقعات پر پورا اترے۔
ان کا کہنا ہے کہ فلسطینیوں کو جدہ کانفرنس سے لا محدود توقعات وابستہ ہیں۔ اگر یہ توقعات پوری نہ ہو سکیں تو عالم اسلام میں مایوسی پھیلے گی۔
مرکزاطلاعات فلسطین کے مطابق ایک عرب خبر رساں ایجنسی سے گفتگو کرتے ہوئے انہوں نے کہا کہ سعودی عرب کی میزبانی میں جاری اسلامی سربراہی کانفرنس میں محض زبانی مذمت اور کاغذی کارروائی کے صہیونی ریاست کی بے لگام سازشوں کی راہ روکنےاور مسجد اقصیٰ کےخلاف جاری ریشہ دوانیوں کو ناکام بنانے کے لیےعملی اقدامات کی ضرورت ہے۔
ایک سوال کے جواب میں انہوں نے کہا کہ اسلامی سربراہ اجلاس کو زبانی اقدامات کے بجائے عملی اقدامات کی ضرورت ہے۔ اس وقت مسئلہ فلسطین، مسجد اقصیٰ اور بیت المقدس کو یہودیوں کی جانب سے سنگین نوعیت کی سازشیں جاری ہیں۔ مسلم دنیا کو جدید چیلنجزکا مقابلہ کرنے کے لیے ٹھوس حکمت عملی مرتب کرنے کی ضرورت ہے۔ اس وقت عالم اسلام کی قیادت اجتماعی فیصلے کر رہی ہے۔ مسلم دنیا کو معلوم ہونا چاہئے کہ صہیونی ریاست عالم اسلام کے امن کے لیے خطرہ ہے۔