(روزنامہ قدس ـ آنلائن خبر رساں ادارہ) اتوار کی شام قابض اسرائیل کے تین فوجی اس وقت زخمی ہو گئے جب غزہ کے جنوبی علاقے میں قابض فوج کی ایک جنگی گاڑی الٹ گئی۔ یہ واقعہ کرم ابو سالم کے قریب پیش آیا جو غزہ کی سرحد کے نزدیک واقع ایک فوجی گزرگاہ ہے۔
قابض اسرائیلی ویب سائٹ حدشوت لو تسنزورا کے مطابق، یہ حادثہ غزہ کے سرحدی علاقے میں واقع غیر قانونی صہیونی بستی کیرم شالوم کے قریب شاہراہ نمبر دو سو بتیس پر اس وقت پیش آیا جب ایک فوجی جیپ تیز رفتاری کے باعث الٹ گئی، جس کے نتیجے میں تین درندہ صفت فوجی مختلف نوعیت کی چوٹوں کا شکار ہوئے۔
یہ واقعہ ایک ایسے وقت میں رونما ہوا ہے جب قابض اسرائیل کی جانب سے غزہ کی پٹی پر گزشتہ بائیس ماہ سے ظلم و بربریت کا سلسلہ جاری ہے۔ نہتے فلسطینیوں پر مظالم کے پہاڑ توڑے جا رہے ہیں اور جبری طور پر بے گھر کیے گئے لاکھوں افراد کو مسلسل بمباری، گولیوں اور قحط کا نشانہ بنایا جا رہا ہے۔ قابض ریاست نے انسانیت کو پسِ پشت ڈال کر بھوک کو بھی ایک ہتھیار کے طور پر استعمال کیا ہے تاکہ غزہ کی عوام کو مکمل طور پر بے بس کیا جا سکے۔
دوسری جانب فلسطینی مزاحمتی قوتیں ثابت قدمی سے قابض اسرائیل کی فوجی جارحیت کے خلاف ڈٹی ہوئی ہیں۔ یہ گروہ نہ صرف عوام کا دفاع کر رہے ہیں بلکہ قبلۂ اول اور دیگر مقدس مقامات کی حرمت کی بھی حفاظت کر رہے ہیں۔ مزاحمت کار مسلسل قابض افواج کو جانی و مالی نقصان پہنچا رہے ہیں اور ان کے جدید ہتھیاروں اور بکتر بند گاڑیوں کو ناکارہ بنا رہے ہیں۔
