یمن کا صہیونی بن گوریون ایئرپورٹ پر بیلسٹک میزائل حملہ

(روزنامہ قدس ـ آنلائن خبر رساں ادارہ) یمن کی مسلح افواج نے جمعرات کو اعلان کیا ہے کہ انہوں نے فلسطینی عوام کے ساتھ یکجہتی کے اظہار میں ایک اہم فوجی کارروائی انجام دی ہے جس میں قابض ریاست کے بن گوریون ہوائی اڈے کو دور مار بیلسٹک میزائل "ذوالفقار” سے نشانہ بنایا گیا۔

یمنی فوج کے جاری کردہ بیان کے مطابق، یہ آپریشن انتہائی کامیاب رہا اور ہدف کو درستگی سے نشانہ بنایا گیا۔ حملے کے فوراً بعد اسرائیل کے تین سے زائد آبادی والے علاقوں میں خوف و ہراس پھیل گیا، ہنگامی الارم بج اٹھے، لاکھوں صہیونی شہری پناہ گاہوں کی طرف بھاگے اور بن گوریون ہوائی اڈے پر تمام پروازیں معطل کر دی گئیں۔

یہ فوجی کارروائی فلسطینی عوام کے ساتھ ہماری عملی یکجہتی کا مظہر اور غزہ میں جاری اسرائیلی تشدد کے خلاف ہمارا واضح احتجاج ہے یمنی فوج کے ترجمان نے بیان میں کہا کہ ہماری حمایت محض الفاظ تک محدود نہیں بلکہ میدان عمل میں بھی ہے اور ہم صہیونی فوج کی اہم فوجی اور اسٹریٹجک تنصیبات کو مسلسل نشانہ بناتے رہیں گے۔

یمنی مسلح افواج نے یہ بھی بتایا کہ وہ اپنی فوجی صلاحیتوں میں مستقل اضافہ کر رہی ہیں تاکہ مستقبل میں اپنے آپریشنز کا دائرہ کار وسیع کیا جا سکے۔ہماری جوابی کارروائیاں اس وقت تک جاری رہیں گی جب تک غزہ میںصہیونی جارحیت کا خاتمہ نہیں ہو جاتا اور وہاں سے محاصرہ مکمل طور پر نہیں ہٹایا جاتا ۔

اپنے بیان کے اختتام پر یمنی فوج نے اس عزم کا اظہار کیا کہ فلسطینی مسئلے کے حل تک ان کی جدوجہد جاری رہے گی۔ انہوں نے فلسطینی عوام کی قربانیوں اور یمنی عوام کی مستقل حمایت کو خراج تحسین پیش کیا۔