(روزنامہ قدس ـ آنلائن خبر رساں ادارہ) شمالی غزہ کے علاقے بیت حانون میں فلسطینی مزاحمت کاروں نے ایک بڑی کارروائی کے دوران غاصب صہیونی فوج پر کاری ضرب لگائی جس میں پانچ فوجی جہنم واصل اور کم از کم دس شدید زخمی ہو ئے جبکہ ایک قابض فوجی تاحال لاپتہ ہے۔ یہ معلومات قابض ذرائع نے فراہم کی ہیں۔
یہ کارروائی اس وقت انجام دی گئی جب مزاحمت کاروں نے ایک بکتر بند گاڑی کو نشانہ بنایا، جو قابض فوجیوں کو لے جا رہی تھی۔ پہلے ایک زور دار دھماکہ خیز مواد سے اس گاڑی کو اڑایا گیا، پھر ایک بارود سے لدا روبوٹ، جو گولہ بارود لے جا رہا تھا، کو اینٹی ٹینک میزائل سے نشانہ بنایا گیا۔
اس کارروائی کے بعد جب قابض صہیونی فوج کی ریسکیو ٹیم جائے وقوعہ پر پہنچی تو اسے بھی مزاحمت کاروں نے نشانہ بنایا۔ غاصب ذرائع ابلاغ کے مطابق اس حملے کی آواز اشدود اور عسقلان جیسے قابض علاقوں تک سنی گئی جسے بڑا دھماکہ قرار دیا گیا۔ زخمیوں میں ایک سینئر افسر بھی شامل ہے۔
مارے گئے فوجی قابض اسرائیلی فوج کی ’یَہلوم‘ یونٹ سے تعلق رکھتے تھے جو غزہ میں فلسطینیوں کے گھروں کو بارود سے تباہ کرنے کی مہم میں ملوث ہے۔ اس کی تصدیق الجزیرہ چینل کی فلسطین میں نمائندہ نجوان سمرے نے بھی کی ہے۔
واقعے کے بعد قابض فوج کے جنگی ہیلی کاپٹر جائے وقوعہ پر پہنچے اور زخمیوں کو منتقل کرنے کے ساتھ ساتھ اندھا دھند فائرنگ بھی کرتے رہے۔ صہیونی ذرائع کے مطابق واقعہ تاحال جاری ہےاب تک ایک فوجی غائب ہے اور متعدد فوجی گاڑیاں شعلوں میں لپٹی ہوئی ہیں۔
گذشتہ چند ہفتوں سے مزاحمتی کارروائیوں میں غیر معمولی شدت دیکھی گئی ہے جن میں درجنوں قابض فوجی اور افسر ہلاک اور زخمی ہو چکے ہیں۔
قابض اسرائیلی ذرائع کے مطابق جون کا مہینہ ان کے فوجیوں کے لیے سب سے زیادہ خونی ثابت ہوا جس میںبیس قابض فوجی اور افسر ہلاک ہوئے۔ چند دن قبل ہی قابض اسرائیلی فوج نے جنوبی غزہ میں خان یونس کے قریب چھ فوجیوں اور ایک افسر کی ہلاکت کا اعتراف کیا تھا حالانکہ ابتدا میں قابض میڈیا نے صرف چار فوجیوں کی ہلاکت اور سترہ کے زخمی ہونے کی اطلاع دی تھی۔
گزشتہ ہفتے مزاحمت کاروں نے شمالی غزہ کے علاقے الشجاعیہ میں تین گھنٹوں کے دوران تین الگ الگ کارروائیاں انجام دیں جن کا نشانہ قابض اسرائیلی فوج کی نخبوہ اٹھانوویں بٹالین بنی۔ ان کارروائیوں میں ایغوز یونٹ کا ایک فوجی مردار اور آٹھ زخمی ہوئے جن میں سے تین کی حالت نازک بتائی گئی ہے۔
