وزیراعظم پاکستان سے فلسطینی صدر کے مشیر اور امامِ مسجد اقصیٰ کی ملاقات

(روزنامہ قدس ـ آنلائن خبر رساں ادارہ) وزیراعظم پاکستان سے فلسطینی صدر کے مشیر برائے مذہبی امور محمود صدیقی الھباش اور مسجد اقصیٰ کےامام احمد حسین  نے ملاقات کی۔محمود صدیقی الھباش فلسطین کی شرعی عدالت کے چیف جسٹس بھی ہیں ملاقات میں پاکستان میں فلسطینی سفیربھی موجود تھے۔

وزیراعظم  نے فلسطین کےلیے پاکستانی عوام کی غیر متزلزل حمایت کا اعادہ کیا۔وزیر اعظم شہباز شریف نے کہا کہ پاکستان فلسطین کی عوام کے لیے اپنی مکمل حمایت جاری رکھےگا، فلسطینیوں نے بے پناہ قربانیاں دیں اور بہادری سےسفاک صہیونی جارحیت کاسامنا کررہےہیں۔

وزیر اعظم کا کہنا تھا کہ ہرسفارتی فورم پرفلسطینی عوام کےحقوق کے لیے پوری قوت سےآوازبلند کرتےرہیں گے پاکستان غزہ کے لوگوں کے لیے انسانی امداد کی فراہمی جاری رکھےگا۔

فلسطینی صدرکے مشیر نےغیرمتزلزل حمایت پرپاکستانی عوام اور حکومت کا شکریہ ادا کیا۔ انہوں نے کہا کہ پاکستان اس مشکل وقت میں ان کےلیے تقویت کا باعث ہے فلسطینی صدر کے مشیر نے پاکستان میں حالیہ سیلاب پر تعزیت کا بھی اظہار کیا۔

خیال رہے کہ محمود صدیقی الھباش اسلام آباد میں سیرت النبیﷺ کانفرنس میں شرکت کے لیے آنے والے فلسطینی وفد کی قیادت کررہے ہیں۔