نابلس میں قابض اسرائیلی فوج کی فائرنگ سے احمد عبد الفتاح شہید

(روزنامہ قدس ـ آنلائن خبر رساں ادارہ) غرب اردن کے شمالی شہر نابلس کے جنوبی علاقے میں واقع گاؤں عورف کے رہائشی احمد عبد الفتاح احمد شحادہ کو قابض اسرائیلی فوجیوں نے المربعہ چیک پوسٹ کے قریب گولی مار کر شہید کر دیا۔

موقع پر موجود عینی شاہدین کے مطابق قابض فوجیوں نے احمد شحادہ پر اس وقت براہِ راست اور شدید فائرنگ کی جب وہ چیک پوسٹ کے نزدیک موجود تھے۔ گولی لگنے سے وہ شدید زخمی ہو کر زمین پر گر گئے، لیکن قابض فوجیوں نے انہیں وہیں تڑپتا چھوڑ دیا اور کسی کو بھی ان تک طبی امداد پہنچانے کے لیے قریب جانے کی اجازت نہیں دی۔

فلسطینی ہلال احمر نے تصدیق کی کہ ان کی طبی ٹیموں نے فوری طور پر جائے وقوعہ پر پہنچ کر زخمی کو طبی امداد فراہم کرنے کی کوشش کی تاہم قابض فوج نے انہیں چیک پوسٹ کے راستے آگے بڑھنے سے روک دیا۔

واضح رہے کہ غرب اردن میں قابض اسرائیل کی فوجی چوکیاں موت کے پھندے بن چکی ہیں جہاں تعینات فوجی اہلکار آئے روز فلسطینی نوجوانوں پر بلا اشتعال فائرنگ کرتے ہیں۔ گزشتہ چند مہینوں کے دوران اسی نوعیت کے واقعات میں درجنوں فلسطینی شہید اور زخمی ہو چکے ہیں۔