غزہ نسل کشی کے دو سال، دنیا بھر میں فلسطین سے اظہارِ یکجہتی

(روزنامہ قدس ـ آنلائن خبر رساں ادارہ) غزہ میں جاری صہیونی نسل کشی کو دو سال مکمل ہونے پر مختلف ممالک میں فلسطینیوں سے اظہار یکجہتی کے لیے مظاہرے کیے گئے۔

غیر ملکی خبر رساں ادارے کے مطابق دنیا بھر کے ممالک میں سفاکانہ اسرائیلی مظالم کے خلاف احتجاج کیا گیا امریکی شہر نیویارک میں فلسطینیوں کے حق میں احتجاج کیا گیا جس دوران ہزاروں افراد نے فلسطین سے یکجہتی کا اظہار کیا۔

جرمنی کے دارالحکومت برلن اور فرینکفرٹ میں مظاہرین کی جانب سے فری فلسطین کے نعرے لگائے گئے مظاہرین نے جابرانہ اسرائیلی مظالم کے خلاف بینر بھی اٹھارکھے تھے ۔لندن میں بھی فلسطینیوں سے اظہار یکجہتی کے لیے مظاہرہ کیا گیا۔

لاطینی امریکا کے ممالک چلی اور میکسیکو میں مظاہرین نے غاصب اسرائیلی سفارتخانے بند کرنے کا مطالبہ کیا۔برازیل میں احتجاج کے دوران پولیس اور مظاہرین کے درمیان جھڑپیں دیکھنے میں آئیں،

انڈونیشیا کے دارالحکومت جکارتہ میں فلسطینی پرچم تھامے مظاہرین نے امریکی سفارتخانے کے سامنے احتجاج کیا۔

مزید برآں سڈنی، پیرس، جنیوا، ایتھنز، استنبول اور اسٹاک ہوم سمیت کئی یورپی شہروں میں بھی فلسطین کے حق میں ریلیاں نکالی گئیں۔

واضح رہے کہ غزہ میں ساتھ اکتوبر 2023 کو شروع ہونے والی قاتلانہ اسرائیلی جارحیت اور فلسطینیوں کی نسل کشی آج دو سال بعد بھی جاری ہے۔